Вадзім Пракопʼеў ідзе ў палітыку і Каардынацыйную раду
Бізнесовец Вадзім Пракопʼеў збіраецца прыняць удзел у выбарах у Каардынацыйную раду. На яго думку, у дэмакратычным руху ўтварыўся «вакуум лідарства», што можа перашкодзіць беларусам заняць месца за сталом будучых мірных перамоў.
Фота з pravda.com.ua
— Цяпер у нас, беларусаў, няма субʼекта, які б біўся за незалежнасць Беларусі за сталом будучых мірных перамоў, — заявіў Вадзім Пракоп'еў «Люстэрку». — Справы ідуць дрэнна, верагоднасць негатыўнага сцэнара — прыстойная. Калі нам, нашым дзецям і ўнукам патрэбна жывая Беларусь, то трэба браць ініцыятыву ў свае рукі і дзейнічаць».
Для гэтага, на думку Пракопʼева, грамадству патрэбны дзве апоры: масавы народны рух і працаздольны протапарламент. З функцыяй апошняга, кажа экс-рэстаратар, цалкам справіцца Каардынацыйная рада:
— Смяяцца не спяшайцеся. Гэта будзе менавіта новая Каардынацыйная рада, дзе збяруцца прадстаўнікі, вылучаныя і абраныя беларусамі. Магчыма, сярод іх буду і я. Я пайду на гэтыя выбары і я заклікаю ўсіх, каму дарагая Беларусь, пайсці разам са мной.
Што да масавага народнага руху, пра які казаў Пракопʼеў, то, паводле яго слоў, ствараць новую палітычную сілу альбо далучацца да ўжо дзеючай ён не плануе.
Але мае намер абапірацца на дыяспары беларусаў за мяжой. Для гэтага яшчэ з пачатку лістапада Пракоп'еў разам з прадстаўніком Абʼяднанага пераходнага кабінета па абароне і нацыянальнай бяспецы Валерыем Сахашчыкам і спікерам Каардынацыйнай рады Андрэем Ягоравым удзельнічаў у сустрэчах з прадстаўнікамі беларускіх дыяспар у некалькіх гарадах Польшчы, Германіі і ЗША.
— Ініцыятывы там шмат, ідэй — звышдастаткова, людзей — патэнцыйна сотня тысяч, а можа, і больш, усё залежыць толькі ад нас, — кажа Пракопʼеў. — Дыяспары гатовы дзейнічаць, ім патрэбны інструмент. Рух і новая Каардынацыйная рада — вось найкарацейшы шлях да новага лідарства.
Ці не збіраецца ён скласці канкурэнцыю за лідарства ў дэмакратычных сілах Беларусі Святлане Ціханоўскай? Новаспечаны палітык кажа, што такой мэты ў яго пакуль няма:
— Частка нашага дэмакратычнага руху чамусьці лічыць, што перамагчы Лукашэнку можна толькі пасля перамогі над Ціханоўскай. Я да гэтай групы людзей не належу. Я лічу за лепшае канцэнтравацца на іншым — на Беларусі і беларусах, на размове з актывістамі ў дыяспарах, на выбарах у новую Каардынацыйную раду, на дыялогу з людзьмі ў Беларусі, на стварэнні масавага руху.
Паўнамоцтвы цяперашняга складу Каардынацыйнай рады заканчваюцца 8 лютага 2024 года. Рашэнне аб тым, у якім фармаце пройдуць выбары ў гэтую структуру, яе сябры прымуць 8 снежня 2023 года.
Глядзіце таксама
