Беларускіх тэнісістаў дапусцяць да ўдзелу ў адкрытым чэмпіянаце ЗША, але без сцягу

Тэнісісты з Расіі і Беларусі змогуць прыняць удзел у адкрытым чэмпіянаце ЗША, які пройдзе ў канцы гэтага году ў Нью-Ёрку. Пра гэта паведамілі арганізатары турніру.

Пры гэтым, як гаворыцца ў паведамленні, спартоўцы з гэтых краін павінны будуць выступаць пад нейтральным сцягам.

Тэнісная асацыяцыя Злучаных Штатаў (USTA), якая з’яўляецца гаспадаром US Open, заявіла ў прэс-рэлізе, што «раней асуджала і працягвае асуджаць несправакаванае і несправядлівае ўварванне Расіі ва Украіну».

USTA таксама падтрымала забарону расійцам і беларусам на ўдзел у міжнародных камандных спаборніцтвах, уведзеную Міжнароднай тэніснай федэрацыяй (ITF) пасля ўварвання Расіі ва Украіну.

Украінскія спартоўцы будуць байкатаваць спаборніцтвы, у якіх прымуць удзел прадстаўнікі Расіі і Беларусі, заявіў 14 чэрвеня міністр моладзі і спорту Украіны Вадзім Гутцайт.