Падчас матча ЧС у Катары на поле выбег мужчына з вясёлкавым сцягам і надпісам у падтрымку Украіны (фота)

Да апошняга матча другога тура групавога этапу ЧС-2022 Партугалія — Уругвай усе матчы абыходзіліся без скандалаў, звязаных з пранікненнем заўзятараў на поле. І ўсё-ткі інцыдэнт здарыўся, адзначае Sports.ru.

На 51-й хвіліне гульні Партугалія — Уругвай на газон вырваўся мужчына з вясёлкавым сцягам. Прабегшы за цэнтральны круг, ён кінуў сцяг на траву (неўзабаве яго падняў арбітр).

Самога заўзятара павалілі на полі двое вельмі хуткіх ахоўнікаў. Яны адвялі яго ў падтрыбуннае памяшканне (напэўна, яму пагражае нейкае пакаранне).

Заўзятар быў у футболцы Супермэна.

Таксама на спіне быў надрукаваны надпіс «Respect for Iranian Women», а на грудзях — «Save Ukraine».

Праз некаторы час стала вядома, хто гэта. Гэта італьянец Марыа Фэры, які ўжо выбягаў на поле больш за 10 разоў за кар'еру. Самыя рэзанансныя выпадкі:

у паўфінале ЧС-2010 паміж Іспаніяй і Германіяй — з вувузелай і ў футболцы з надпісам «Касана ў зборную!»;

у фінале клубнага ЧС-2010 у Абу-Дабі — яго затрымалі і выслалі ў Італію;

на матчы ЧС-2014 Аргенціна — ЗША;

на матчы «Напалі» — «Ювентус» у 2017 годзе.

Ён выбягаў з рознымі пасланнямі — ад «Мір ва ўсім свеце» да «Выратуйце дзяцей у фавелах».

У сакавіку 2022-га Фэры (ён яшчэ і футбаліст, звязаны кантрактам з клубам «Юнайтэд Спортс Клаб» з Індыі) паехаў на мяжу Польшчы і Украіны падчас паўзы ў чэмпіянаце. Ён працаваў валанцёрам, дапамагаючы бежанцам. Ён арандаваў аўтамабіль і вазіў жанчын і дзяцей у польскія гарады (адзін раз вёз жанчыну і яе сына ў Варшаву 15 гадзін).