«Ад сёння мы ўсе прэзідэнты». Самае важнае з прэзідэнцкай прамовы Зяленскага
Сёння Уладзімер Зяленскі прысягнуў на вернасць украінскаму народу і зрабіў адразу некалькі рэзанансных заяў, у тым ліку пра роспуск парламенту, піша «Радыё Свабода».
Пра новую каманду
«Нас 65 мільёнаў, тых, каго нарадзіла ўкраінская зямля. Украінцы ў Еўропе і Азіі, Паўночнай і Паўднёвай Амерыцы, Аўстраліі і Афрыцы. Я звяртаюся да ўсіх украінцаў на планаце. Вы нам вельмі патрэбны. Усім, хто можа дапамагчы стварыць паспяховую і моцную Украіну, я з радасцю дам украінскае грамадзянства. Вы павінны ехаць ва Украіну. Прывязіце нам свае веды, свой досвед і ментальнасць сумленнасці. Усё гэта дапаможа нам пачаць новую эпоху».
Пра прэзідэнцтва і адказнасць усіх грамадзян за выбар
«Пасля перамогі на выбарах мой шасцігадовы сын сказаў: «Тата, я па тэлевізары бачыў, кажуць, што Зяленскі — прэзідэнт. Тады гэта прагучала як дзіцячы жарт, але потым я зразумеў, што насамрэч гэта праўда. Таму што кожны з нас — прэзідэнт. Не тыя 73%, якія за мяне галасавалі, а ўсе 100%. Гэта наша агульная перамога, і гэта наш агульны шанец. Кожны з нас прэзідэнт».
«Ад сёння кожны з нас нясе адказнасць за Украіну, якую мы пакідаем сваім дзецям. Кожны з нас загінуў на Данбасе, кожны дзень мы губляем кожнага з нас. Кожны з нас перасяленец... Але мы ўсё гэта пераадолеем, бо мы ўсе ўкраінцы. Не існуе большых ці меншых. Кожны з нас украінец — ад Ужгараду да Луганску, ад Чарнігава да Сімферопаля, у Львове, Харкаве, у Данецку, Дняпры і Адэсе. Мы павінны быць адзіныя, бо толькі тады мы моцныя».
«На працягу ўсяго жыцця я стараўся рабіць усё, каб украінцы ўсміхаліся. Гэта была не толькі мая праца, гэта было маёй місіяй. У наступныя 5 гадоў я зраблю ўсё, каб украінцы не плакалі».
Пра мір на Данбасе
«Мяне часта пыталіся, на што я гатовы дзеля спынення агню. Дзіўнае пытанне. А на што гатовыя вы, украінцы, дзеля жыцця блізкіх вам людзей? На што? Магу запэўніць, што для таго, каб нашы героі больш не гінулі, я гатовы на ўсё. Я дакладна не баюся ўхваляць складаныя і непапулярныя рашэнні, губляць сваю папулярнасць і рэйтынгі. І, калі будзе трэба, я без ваганняў гатовы страціць сваю пасаду, каб толькі наступіў мір».
Пра ўрад
«Дазвольце мне зараз працытаваць аднаго амерыканскага актора, які стаў класным амерыканскім прэзідэнтам: «Урад не вырашае нашых праблем, урад і ёсць наша праблема», — працытаваў Уладзімір Зяленскі Рональда Рэйгана.
«Гэта проста цытата. Я не разумею, шчыра кажучы, наш урад, які толькі разводзіць рукамі і кажа: “Мы нічога ня можам зрабіць”. Гэта няпраўда, можаце. Вы можаце ўзяць паперу, ручку і вызваліць свае месцы для тых, хто будзе думаць пра наступныя пакаленні, а не пра наступныя выбары. Думаю, што людзі гэта ацэняць».
Пра парламент і сілавыя структуры
«Народныя дэпутаты, вы прызначылі самі інаўгурацыю на панядзелак, на працоўны дзень. Я бачу ў гэтым плюс. Гэта значыць, што сёння вечарынак не будзе. Будзем з вамі працаваць. Таму я вельмі вас прашу прыняць закон аб скасаванні дэпутацкай недатыкальнасці, закон аб крымінальнай адказнасці за незаконнае ўзбагачэнне, шматпакутны Выбарчы кодэкс. І зрабіце, калі ласка, адкрытыя спісы».
«Таксама я прашу вас вызваліць ад пасад кіраўніка Службы Бяспекі, генеральнага пракурора, міністра абароны. Гэта далёка не ўсё, што вы можаце зрабіць, але для пачатку дастаткова. На гэта ў вас ёсць два месяцы. Зрабіце гэта і павесьце медалі сабе. Някепскія балы на датэрміновыя парламенцкія выбары».
«Я распускаю Вярхоўную Раду восьмага скліканьня».
Пра сябе
«Я хачу, каб у вашых кабінетах не было маіх выяваў, калі ласка, не было маіх партрэтаў. Таму што прэзідэнт не вобраз, не ідал. Прэзідэнт — гэта не партрэт. Павесьце туды фатаздымкі сваіх дзяцей і перад кожным сваім рашэннем глядзіце ім у вочы».