Арыі ў космасе

Урад Індыі патрабуе ад мясцовых вучоных штудзіраваць тэксты старажытных арыйскіх Ведаў, якія, быццам, хаваюць сакрэты фантастычных навуковых прарываў.



9xqbxf3hmoe.jpg

Мы ўжо пісалі пра арыгінальныя ўчынкі цяперашняга ўраду Індыі, якім кіруе Нарэндра Модзі — індускі традыцыяналіст, лідар індускай нацыянальнай партыі «Бхаратыя джаната парты» (BJP). Гутарка тады ішла пра заснаванае ў мінулым годзе міністэрства ёгі, якое павінна прапагандаваць традыцыйную індыйскую медыцыну, у тым ліку і практыку ёгі. Старадаўнія рэцэпты і розныя гімнастычныя практыкі, на думку ідэолагаў палітычнага індуізму, павінны ў хуткай будучыні пацясніць звычайныя медыцынскія методыкі лячэння хвароб.

Цяпер індускімі нацыяналістамі зроблены наступны крок у рэстаўрацыі нацыянальнай традыцыі. Яшчэ на пачатку года ў рамках святкавання 102-й гадавіны Асацыяцыі індыйскіх навукоўцаў прадстаўнік ураду заклікаў вучоных штудзіраваць Веды — зборнік старажытных сакральных тэкстаў індуізму на санскрыце.

Індуісцкая рэлігійная традыцыя лічыць Веды тэкстамі, якія былі створаныя не чалавекам, а багамі. Быццам, тыя тэксты багі перадалі чалавецтву праз святых мудрацоў. Большасць навукоўцаў сыходзяцца на тым, што першыя Веды былі створаныя каля XVI стагоддзя да нашай эры, а на працягу многіх стагоддзяў існавала вусная традыцыя іх перадачы. З-за недаўгавечнасці матэрыялу, на якім запісваліся Веды (для гэтага выкарыстоўвалася драўняная кара або пальмавыя лісты) узрост манускрыптаў, якія дайшлі да нас, не перавышае некалькіх сотняў гадоў. Найстаражытныя манускрыпты «Рыгведы» — адна з частак Ведаў — датуюцца XI стагоддзем. Хаця жанрава Веды — гэта зборнік мантраў, якія прызначаліся для рытуалу ахвярапрынашэнняў у часы панавання ведыйскай рэлігіі, некаторую інфармацыю і іх пра тагачасныя рэаліі атрымаць можна.

Напрыклад, на думку Нарэндры Модзі і яго міністраў, у старадаўніх Ведах утрымліваюцца сакрэты самых перадавых тэхналогій. Гэта следства таго, што старажытныя арыі былі не толькі самай духоўнай нацыяй, аднак таксама абышлі ўсе тагачасныя народы ў тэхнічным прагрэсе. Каля сямі тысяч гадоў таму яны мелі не толькі авіяцыю, аднак і апараты, якія былі здольныя бараздзіць касмічную прастору. Таксама старадаўнія індусы мелі механізмы, якія ў наш час называюць радары.

Нехта капітан Ананд Бодас (captain Anand J Bodas), галоўны прапагандыст кампаніі па вывучэнні навукоўцамі Ведаў, нават вылічыў, памеры лятальных апаратаў арыеў. У сярэднім касмічны карабель быў даўжынёй каля 60 метраў, а на іх былі ўсталяваныя 40 матораў.

На закліках чыноўнікаў вывучаць Веды справа не спынілася. Індыйскім універсітэтам была дасланая прапанова арганізаваць на месцах канферэнцыі навуковай грамадскасці, прысвечаныя даследаванню Ведаў. Ужо абвешчана, што ў хуткім часе на гэтую тэму пад эгідай ураду пройдзе агульнанацыянальны кангрэс.

Наколькі сапраўды старажытныя манускрыпты здольныя дапамагаць сучаснай навуцы? Сябры індыйскага ўраду і асобы накшталт Бодаса не маюць сумневаў, што ў тых тэкстах ёсць карысная інфармацыя. У дадатак яны прыводзяць статыстыку. На цяперашні момант на старонках Ведаў знойдзена цэлых 97 рэферэнцыяй пра авія- і касмічныя палёты. Калі верыць аматарам Ведаў, у тэкстах ёсць нават апісанне касцюма арыйскага астранаўта і падрабязнае апісанне іх меню, у аснове якога малочныя прадукты. Таксама, на іх думку, у старажытных рукапісах хаваюцца сакрэты сплаваў металаў, з якіх арыі рабілі касмічныя караблі. Цяперашнім індыйскім вучоным застаецца толькі адрадзіць былыя напрацоўкі.

Дарэчы, у ходзе цяперашняй кампаніі па даследаванні Ведаў там знайшлі шмат цікавага і раней не вядомага. Напрыклад, сцвярджаецца, што ў рукапісах прысутнічае інфармацыя, якая дазваляе казаць, што славутую тэарэму Піфагора таксама прыдумалі індусы.

45698358.jpg

Рам Гандхіраман 

Падобныя сенсацыі, якія хутчэй цягнуць на загалоўкі жоўтай прэсы, імкліва стварылі рух апанентаў «арыізацыі» індыйскай навукі. Лідар напрамку — Рам Гандхіраман (Dr. Ram Prasad Gandhiraman), супрацоўнік амерыканскага касмічнага агенцтва NASA, індус на нацыянальнасці. Рам арганізаваў сярод вучоных збор подпісаў супраць афіцыйнага курсу «антынавуковай інфільтрацыі ў акадэмічныя праграмы з дапамогай палітыкі». Па яго словах, калі вучоныя будуць спакойна глядзець на антынавуковыя выбрыкі шавіністаў з «Бхаратыя джаната парты», у краіне абарвецца навуковая традыцыя, у выніку чаго будуць страчаныя цэлыя генерацыі індускіх навукоўцаў. Зараз петыцыю падпісалі каля 200 індусаў, якія працуюць у розных акадэмічных праграмах па ўсім свеце.

Мяркуючы па ўсім, Рам Гандхіраман мае рацыю. Індускія чыноўнікі маюць намер сур’ёзнай рэвізіі навукі. На днях Модзі наведаў адзін са шпіталяў і заявіў, што ў старажытнай Індыі дакладна рабілі пластычныя і генетычныя аперацыі. Аргументуючы сваю пазіцыю, ён узгадаў аднаго з багоў арыйскага пантэону, які паводле міфу быў народжаны не з жаночага ўлоння. У штаце Ута-Прадзеш ужо былі спробы выкладання ў мясцовых школах такога прадмету, як «ведычная матэматыка». Усё гэта адбываецца на фоне адпаведных прававых паправак. У Бамбеі плануецца ўвесці крымінальную адказнасць за забойства сакральных у індуізме жывёл. Тых, хто парушыў норму, чакае 5 гадоў турмы. Па словах ініцыятара папраўкі, гэты законапраект праз сон яму даслалі багі.

Пакуль, праўда, усе ініцыятывы індуістаў не набылі сур’ёзных маштабаў. Магчыма, таму рэакцыя публікі на навіны пра арыяў-касманаўтаў у большасці іранічная. У індыйскай прэсе смяюцца, што хутка ў апараце ўраду Індыі з’явіцца дэпартамент або нават міністэрства, якое зоймецца прапагандай на дзяржаўным узроўні камасутры.