Ці сапраўды ў ЗША збілі «талеркі» прышэльцаў? Ісціна недзе побач

Байка, якую шмат разоў эксплуатаваў Галівуд, стала рэальнасцю. Ёсць меркаванне, што на днях Амерыка ўступіла ў сапраўдны бой з прышэльцамі з космасу.

Што мы маем? 10, 11 і 13 лютага ў небе над Аляскай і Канадай былі збіты тры лятальныя аб'екты. Спачатку ўсе думалі, што гаворка пра чарговыя кітайскія шары. Адзін такі аэрастат нядаўна праляцеў над Штатамі, справакаваўшы масу чутак і скандалаў. Пекін сцвярджаў, што шар выкарыстоўвалі метэаролагі, але многія ў ЗША лічылі, што пад выглядам палёту метэаралагічнага прыбора кітайцы праводзілі шпіёнскую аперацыю.
Але аб'екты, з якімі ў сярэдзіне лютага змагаліся амерыканцы, на паверку аказаліся не кітайскімі шарамі. Каментуючы інцыдэнт, кіраўнік супрацьпаветранай абароны ЗША генерал Глен Ван Херк, паведаміў, што «не выключае пазаземнага паходжання дадзеных апаратаў». А прэзідэнт Байдэн тут жа даручыў стварыць міжведамасную групу для «паглыбленага аналізу феномена».
У жоўтых СМІ і на форумах аматараў існавання НЛА тут жа пачалася сапраўдная істэрыка, што, дарэчы, нядзіўна. Калі «талеркі» сапраўды былі збіты, то па іх абломках і механізмах можна даведацца вельмі шмат пра прышэльцаў.
Не выключана, што нехта з пілотаў-іншапланецян выжыў. У гэтым плане многія параўноўваюць цяперашнюю сітуацыю з Розуэльскім інцыдэнтам — легендай аб крушэнні неапазнанага лятальнага аб'екта каля горада Розуэл у штаце Нью-Мексіка ў ліпені 1947 года. У розных публіцыстычных крыніцах ходзіць папулярная версія, паводле якой пілот лятальнага апарата з'яўляўся іншапланецянінам. «Зялёнага чалавечка» ўрад ЗША, нібыта, захапіў і схаваў, каб праз яго весці дыялог з братамі па розуме.
Як бачым, у гэтай публікі няма ніякіх сумневаў, што над Аляскай і Канадай былі збіты менавіта лятальныя талеркі. Збольшага такі энтузіязм можна растлумачыць спецыфікай субкультуры аматараў веры ў існаванне НЛА. Удзельнікі секты часта становяцца аб'ектамі жартаў з-за таго, што ўвесь час гавораць аб зялёных чалавечках. Цяпер іх тэорыі ўскосна пацвярджаюць самыя высокапастаўленыя вайскоўцы і палітыкі.
Зрэшты, у версіі з прылётам НЛА хапае і скептыкаў. Базу для сумневаў дае і тая акалічнасць, што амерыканскія вайскоўцы неяк вельмі доўга дабіраюцца да астанкаў збітых апаратаў. Зыходзячы з гэтага, дапускаюць, што адміністрацыя Байдэна проста выкарыстоўвае тэму іншапланецян для прасоўвання нейкіх уласных інтарэсаў.Напрыклад, не выключаюць, што ў Белым доме хочуць разрэкламаваць каманду Байдэна як паслядоўных дэмакратаў. Справа ў тым, што да Байдэна амерыканскія ўлады не рабілі сур'ёзных спроб уважлівага вывучэння інцыдэнтаў з НЛА. Больш за тое, інфармацыя пра іх блакіравалася, што выклікала нараканні многіх амерыканцаў.
І вось зараз наступіла доўгачаканая эра галоснасці і празрыстасці. «Паведамленні аб гэтых неапазнаных паветраных з'явах паступалі на працягу многіх гадоў без якіх-небудзь тлумачэнняў або дбайнага вывучэння з боку ўрада, — заявіў журналістам прадстаўнік Савета нацыянальнай бяспекі Белага дома Джон Кірбі. І рэзюмаваў: — Прэзідэнт Байдэн усё гэта змяніў. Мы, нарэшце, спрабуем іх (аб'екты НЛА) лепш зразумець».
Магчыма, медыйная істэрыка вакол НЛА заклікана адцягнуць увагу публікі ад канфузу з кітайскім аэрастатам. Частка блізкіх да Трампа рэспубліканцаў крытыкуе Байдэна за нерашучасць яго адміністрацыі ў прыняцці рашэння аб ракетнай атацы на кітайскі шар.
Нарэшце, дапускаюць, што сенсацыі з нагоды прылёту іншапланецян павінны затушаваць усё яшчэ актуальную гісторыю са скандальнай інфармацыяй, выяўленай у ноўтбуку Хантэра Байдэна: доказы сувязей сына прэзідэнта ЗША з крымінальнай дзейнасцю (наркотыкі, прастытуцыя) і кампраметавальныя фінансавыя дакументы. Такі кампрамат дыскрэдытуе дзеючага гаранта напярэдадні старту выбарчай кампаніі 2024-га.
На думку ж расійскіх экспертаў, неабходна супаставіць факт з'яўлення інфармацыі пра НЛА з тым, што 8 лютага вядомы журналіст, лаўрэат Пулітцэраўскай прэміі Сеймур Херш выпусціў матэрыял-расследаванне, у якім, нібыта, утрымліваюцца доказы ўдзелу ЗША ў дыверсіі на «Паўночных патоках».
Самая экзатычная версія — тэма НЛА можа стаць новым сюжэтам сусветнага апакаліпсісу, які прыйдзе на змену COVID-19. Да канца, праўда, незразумела, якія практыкі і абмежаванні глабальныя эліты будуць спрабаваць навязаць насельніцтву на падставе магчымай пагрозы з космасу.
Як бачым, версій хапае на любы густ. Але сярод усіх тэорый і версій вакол гісторыі з НЛА ёсць прагноз, з якім, напэўна, можна пагадзіцца. Ажыятаж вакол НЛА прымусіць шматлікіх людзей часцей глядзець на неба, у якім ім можа ўбачыцца нешта незвычайнае. «Можна чакаць каскада паведамленняў аб з'яўленні ў небе НЛА, што, вядома, негатыўна паўплывае на працу паліцыі, супрацоўнікам якой давядзецца займацца падобнымі паведамленнямі», — піша брытанская прэса.