Дасье ў карыкатурах: ва Украіне стартуе новы Майдан?

8 снежня а 14-й гадзіне паводле мінскага часу ў Кіеве пачалася акцыя, якая, як не выключаюць яе арганізатары, можа трансфармавацца ў Майдан супраць прэзідэнта Зяленскага і нават прывесці да яго звяржэння. Як Уладзімір Зяленскі праз паўгода пасля трыўмфальнай перамогі на прэзідэнцкіх выбарах дайшоў да такога?

Майдан 8 снежня. Фота fakty.ua

Майдан 8 снежня. Фота fakty.ua

Перамога Зяленскага ў красавіку была сапраўды трыўмфальнай. Гэты трыўмф замацаваў поспех яго партыі Слуга народа (СН) на ліпеньскіх парламенцкіх выбарах. СН атрымала абсалютную большасць мандатаў — беспрэцэдэнтны выпадак у гісторыі краіны. Не дарма некаторыя ўкраінскія каментатары нават заклікалі называць поспех Зяленскага ў падручніках «электаральным Майданам». А тое, што выбары прайшлі абсалютна празрыста, разглядалася як лепшая рэклама дэмакратычнай мадэлі, прынамсі, для постсавецкай прасторы. Тэматычны малюнак нямецкага выдання Deutsche Welle.

1_256.jpg


«Зеленаманія» доўжылася прыкладна да сярэдзіны верасня. Першы сур'ёзны іміджавы ўдар новы прэзідэнт атрымаў ад амерыканцаў. Дэмакраты абвінавацілі Трампа ў тым, што той шантажаваў Зяленскага, заклікаючы расследаваць крымінальную справу супраць сям'і свайго канкурэнта на выбарах дэмакрата Джо Байдэна. У доказ сваёй нявінаватасці Трамп выклаў (без згоды Кіева!) фрагменты размовы з украінскім калегам. Падчас яе Зяленскі відавочна нагаварыў лішняга — мітусіўся перад Трампам, крытыкаваў еўрапейскіх партнёраў, абяцаў узяць пад кантроль пракуратуру.
Загладзіць скандал не ўдаецца дагэтуль, паколькі дэмакраты запусцілі працэс імпічменту, а Трамп у сваю чаргу за кошт «украінгейта» марыць пахаваць шанцы дэмакратаў на выбарах. На малюнку выдання Washington Post Дональд прапануе Зяленскаму вырыць дэмакратам магілу. Відавочна, што Зяленскі і яго каманда хочуць трымацца ад гэтай гісторыі як мага далей, аднак, падобна, ад Кіева ўжо мала што залежыць.

2_234.jpg


Аднак куды большую шкоду вобразу Зеленскага як не смешна нанеслі ягоныя партайгеноссе. Укамплектаваныя з незразумелых персанажаў фракцыя партыі «Слуга народа» і ўрад на яе базе нон-стоп дыскрэдытуюць свайго лідара. То міністр эканомікі прызнаецца, што ён «дэбіл», то ўсплывае інфармацыя пра тое, што адзін з дэпутатаў СН быў асуджаны за калектыўнае згвалтаванне малалетняй, то іншы «слуга народа» зладзіць схадняк крыміналу. Аднак пакуль усіх пераплюнуў кіраўнік камітэта па міжнародных справах Багдан Яроменка, які замаўляў куртызанку наўпрост у залі Рады. Рэагуючы на ​​скандал, мастак выдання «Обозреватель» у жарт прапанаваў мадыфікаваць машынкі для дэпутацкага галасавання. ‘

3_215.jpg


Галоўная прычына атрафіі рэйтынгу Зяленскага (мінус 20 працэнтаў за два месяцы) безумоўна стала Зямельная рэформа, згодна з якой здымаецца мараторый на продаж зямель сельгаспрызначэння. Ідэя не карыстаецца падтрымкай: больш за 70% украінцаў выступаюць супраць гэтай меры паколькі баяцца перспектывы скупкі ўкраінскай зямлі замежнікамі. Аднак Зяленскі не прыслухаўся да настрояў народу. Плюс адмовіўся ад свайго абяцання правесці плебісцыт на гэтую тэму. У лістападзе законапраект быў пададзены ў Раду і ўжо прайшоў першае чытанне. Падрыхтоўка рэформы аўтаматычна выклікала хваляванні на сяле, да якіх далучылася партыя Юлі Цімашэнка. На думку ўдзельнікаў пратэсту, у выпадку рэформы Украіна будзе выглядаць як дзіравая камізэлька на малюнку Яўгена Гельда.

4_207.jpg


Аднак на сённяшні Майдан галоўным чынам людзі пойдуць пад транспарантам «Не капітуляцыі!». Пад «капітуляцыяй» маюцца на ўвазе магчымыя саступкі Зяленскага па пытанні Данбаса на нармандскім саміце 9 снежня. Апазіцыя мяркуе, што расійская дыпламатыя рыхтуе Зяленскаму пастку кшталту той, якая намаляваная на малюнку ўкраінскай рэдакцыі Радыё Свабода.

5_195.jpg


Прыкрываючыся мірнымі намерамі, Масква даб'ецца шырокай аўтаноміі для Данбаса што, нібыта, запусціць працэс дэфрагментацыі і разбурэння ўкраінскай дзяржавы. Офіс Зяленскага запэўнівае, што 9 снежня не пракрочыць чырвоныя лініі. Але, падобна, што апазіцыя любы вынік саміту ўспрыме як «здраду», інакш бы яе лідары не рыхтаваліся да такіх маштабных пратэстаў. У Кіеў накіраваныя дэлегацыі актывістаў з правінцыі, ідуць зборы сродкаў на намёты, кухні і г.д.
Пасля мітынгу на Майдане 8 снежня плануецца «вахта» пад офісам прэзідэнта ў выглядзе намётавага мястэчка з перспектывай блакады ўсяго ўрадавага квартала. Пакуль у такі сцэнар верыцца з цяжкасцю, паколькі рэйтынг Зяленскага ўсё яшчэ высокі (52 адсоткі), а апазіцыя не мае адзінага лідара. Аднак, як паказвае найноўшая гісторыя Украіны, у такіх выпадках нічога выключаць нельга.