Макрон: Еўропа не павінна ізаляваць Пуціна і Трампа

Прэзідэнт Францыі Эмануэль Макрон заявіў, што хоць Дональд Трамп і Уладзімір Пуцін і ўяўляюць сабой пагрозу заходніх каштоўнасцей, адкрытасці і талерантнасці, краіны Еўропы не павінны ізаляваць абодвух лідэраў на міжнароднай арэне, паколькі гэта контрпрадуктыўна.

«Калі вы вырашыце проста выпхнуць іх з Еўропы, сказаць: «Вы здраджваеце нашы каштоўнасці, гэта дрэнна!» — вы страціце іх», — сказаў французскі прэзідэнт.
Многія лічаць, што лідэры ЗША і Расіі выступаюць супраць ліберальных каштоўнасцяў.
Днём раней прэм'ер-міністр Вялікабрытаніі Тэрэза Мэй, выступаючы ў Лондане, абрынулася на Расію з лютай крытыкай.
На сустрэчы з лордам-мэрам лонданскага Сіці прэм'ер-завочна звярнулася да расійскага прэзідэнта Уладзіміра Пуціна, прапанаваўшы яму выбраць іншы шлях развіцця Расіі і спыніць умяшальніцтва ва ўнутраныя справы заходніх краін, тым больш што яно бескарысна.
«Мы ведаем, чаго вы дамагаецеся, і ў вас нічога не выйдзе. Таму што вы недаацэньваеце ўстойлівасць нашых дэмакратый, вечную прывабнасць свабодных і адкрытых таварыстваў і прыхільнасць заходніх краін тым альянсам, якія нас звязваюць», — сказала Тэрэза Мэй.
Погляд прэзідэнта Францыі перагукаецца са словамі брытанскага прэм'ера, але акцэнт ён робіць на іншым. Захад здзейсніў памылку, забыўшыся на свае ідэалагічныя асновы, ідэнтычнасці і каштоўнасці, сказаў Эмануэль Макрон у Абу-Дабі, дзе ён прысутнічаў на цырымоніі адкрыцця мясцовага філіяла Луўра.
Ён упэўнены, што роля Францыі — абараняць гэтыя каштоўнасці на сусветнай арэне.
«Нам патрэбна агульная карціна свету, агульныя мэты, агульныя мары», — дадаў Макрон.
«Я думаю, што адной з праблем, якія ўзніклі перад заходнім грамадствам і заходнімі краінамі за апошнія 10 гадоў, быў той факт, што ў нейкім сэнсе мы забыліся пра мары, амбіцыі, стратэгічнае бачанне. Нам патрэбныя мары, нашай моладзі трэба бачанне будучыні».
«Ніхто не натхняецца адзіным рынкам, фінансавымі рынкамі, рэформамі працоўнага права, або бюджэтнымі перспектывамі. Такога не бывае, і калі вы ведаеце такога чалавека, то за яго неабходна турбавацца», — працягнуў ён. — «Людзі нешта робяць, рухаюцца наперад менавіта дзякуючы» вялікім ідэям».
Па словах французскага прэзідэнта, лідэры накшталт Уладзіміра Пуціна выбіраюць іншы, не заходні шлях, з-за страху: «Тлумачацца гэтыя разыходжанні вельмі часта іх паранояй перад пагрозай, іх жаданнем абараніць нешта. Яны пачынаюць моцна нервавацца з-за гэтага. Але яны забываюць той факт, што іх уласная цывілізацыя пабудавана на прынцыпе павагі да тых, хто адрозніваецца ад іх».
«Перш за ўсё, з гэтымі лідэрамі трэба размаўляць. Таму што часам яны могуць змяніцца. Яны не былі такімі з самага пачатку».
На пытанне аб тым, ці ўдалося яму ў чымсьці пераканаць прэзідэнтаў Пуціна і Трампа, Макрон сказаў: «Гэта не адбываецца за адзін дзень, вядома. Але я настроены аптымістычна і надзвычай рашуча».
Кажучы пра ролю Парыжа на міжнароднай арэне, прэзідэнт Макрон сказаў: «Галоўная задача Францыі цяпер — запусціць працэс пераўтварэння Еўропы. Па-другое, Францыя павінна абараняць свае каштоўнасці і інтарэсы, таму што яны цесна паміж сабой звязаныя. Абараняць такія каштоўнасці, як адкрытасць, талерантнасць і свабода».
Паводле BBC