Пашынян: Аліеў плануе генацыд армян Нагорнага Карабаха

Нікол Пашынян заявіў, што геапалітычныя прэтэнзіі ўладаў Азербайджана працягваюць уяўляць пагрозу бяспецы і стабільнасці Паўднёвага Каўказа і больш шырокага рэгіёну ў цэлым.

Прэм'ер-міністр Арменіі Нікол Пашынян заявіў пра гэта сёння на пасяджэнні ўрада, каментуючы заявы прэзідэнта Азербайджана Ільхама Аліева. «Аліеў не толькі пагражае, але ўжо рыхтуе генацыд армян Нагорнага Карабаха. Гэты намер адлюстраваны таксама ў каментарах прэзідэнта Азербайджана адносна тэрмінаў размяшчэння расійскіх міратворчых сіл у Нагорным Карабаху, і гэтыя каментары, у сваю чаргу, груба парушаюць як мінімум тры заявы, якія былі прынятыя ў трохбаковым фармаце», — сказаў Пашынян.

Па словах кіраўніка армянскага ўрада, «па сутнасці, міратворцы знаходзяцца ў Нагорным Карабаху на нявызначаны тэрмін, пакуль не будуць вырашаныя ўсе пытанні, звязаныя з правамі і бяспекай армян Нагорнага Карабаха, і не будуць развеяныя ўсе праблемы адносна бяспекі армян Нагорнага Карабаха».



Нагадаем, днямі Аліеў заявіў: «Што робяць армянскія ўзброеныя сілы ў Карабаху? Наша цярпенне не бязмежнае!». Аліеў заявіў, што цяпер у Арменіі «падымаюць галаву рэваншысцкія сілы, якія не жадаюць мірыцца з вынікамі вайны 2020 года». І дадаў, што расійскія ваенныя дыслакаваныя на тэрыторыі Нагорнага Карабаха на часовай аснове.

Пашынян так пракаментаваў словы Аліева аб тым, што Арменія не цалкам вывела з Карабаха свае ўзброеныя сілы. «У Нагорным Карабаху няма арміі Арменіі, ёсць армія Абароны Нагорнага Карабаха, што, мабыць, з'яўляецца сур'ёзнай перашкодай для рэалізацыі палітыкі генацыду», — сказаў армянскі лідар.



Ён агучыў прапанову аб стварэнні дэмілітарызаванай зоны вакол Нагорнага Карабаха з міжнароднымі гарантыямі.

«Мы ўнеслі прапанову па дэмілітарызацыі таксама па частцы памежнай зоны паміж Арменіяй і Азербайджанам, прапаноўваючы адвесці войскі са зноў пацверджанай вось мяжы 1991 года, стварыўшы паабапал мяжы 3-кіламетровую дэмілітарызаваную зону. Гэта прапанова застаецца ў сіле, і напярэдадні мы перадалі Азербайджану яе абноўленую версію. У любым выпадку, павінен канстатаваць, што ўзброеныя сілы Азербайджана павінны быць выведзеныя з усіх акупаваных частак суверэннай тэрыторыі Рэспублікі Арменія, і гэтая наша пазіцыя ніколі і яна ніякім чынам не зведае змяненняў», — адзначыў ён.

«Калі хтосьці думае, што мірны парадак дня — гэта «мірнае знішчэнне» армян Рэспублікі Арменія або Нагорнага Карабаха, то жорстка памыляецца. Мірны парадак дня — гэта мірнае развіццё і суіснаванне Рэспублікі Арменія і рэгіёну, і мы даможамся сваёй мэты», — дадаў Пашынян.

Паводле www.ekhokavkaza.com

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: