Толькі 6 мігрантаў, якія трапілі ў Літву празь Беларусь, атрымалі статус уцекача

Звыш 1300 мігрантаў атрымалі адмову і цяпер абскарджваюць яе ў судах, піша Свабода.

Літоўскі Дэпартамент міграцыі з лета разгледзеў больш за палову заяў аб прыстанішчы ад мігрантаў, якія нелегальна ўехалі ў краіну. А менавіта 1771 заяву з агульнай колькасці ў 3148 хадайніцтваў, перадае БелаПАН са спасылкай на прэс-службу літоўскага ведамства.
Статус уцекача атрымалі толькі 6 просьбітаў. 1353 іншаземцы атрымалі адмову, а разгляд 412 хадайніцтваў спынілі з прычыны ад’езду заяўнікаў з краіны або іх вяртання на радзіму.
З 3 жніўня Літва не ўпусціла на сваю тэрыторыю амаль 4,9 тысячы мігрантаў, якія спрабавалі незаконна перасячы мяжу з боку Беларусі.
Большасць мігрантаў без дакументаў абскардзілі рашэнні Дэпартаменту міграцыі ў судах і працягваюць заставацца ў цэнтрах часова размяшчэння, чакаючы канчатковага рашэння. Па словах начальніка Дэпартамента міграцыі Эвеліны Гудзінскайце, спецыялісты пастаянна кантактуюць з мігрантамі, інфармуюць іх аб прынятых рашэннях і нагадваюць пра магчымасць добраахвотна вярнуцца ў краіну паходжання, інфармуе BNS.
У памежных з Беларуссю раёнах Літвы дзейнічае надзвычайнае становішча.