Трамп: Парыжане маглі б абараніцца ад тэрарыстаў, калі б мелі зброю

"У Парыжы зброі не аказалася ні ў каго, акрамя як у дрэнных хлопцаў", — адзначыў амерыканскі мільярдэр Дональд Трамп.



Дональд Трамп © AP Photo / Seth Perlman

Мільярдэр Дональд Трамп, які хоча вылучыцца кандыдатам у прэзідэнты ЗША ад Рэспубліканскай партыі, лічыць, што тэракты ў Парыжы маглі б не прывесці да такой вялікай колькасці ахвяр, калі б у Францыі былі больш ліберальныя законы, якія тычацца права на валоданне агнястрэльнай зброяй і яе нашэнне. Пра гэта палітык заявіў у суботу падчас выступу перад сваімі прыхільнікамі ў амерыканскім горадзе Бамонт (штат Тэхас),  паведамляе CNN.

"Калі казаць пра Парыж, то ў гэтым горадзе самыя строгія ў свеце законы, якія тычацца агнястрэльнай зброі, — адзначыў бізнесмен, які, паводле апытанняў, з'яўляецца найбольш папулярным удзельнікам перадвыбарчай гонкі сярод аднапартыйцаў. — У Парыжы зброі не аказалася ні ў каго, акрамя як у дрэнных хлопцаў".

Па словах Трампа, тэрарысты "проста расстрэльвалі іх (мірных жыхароў) аднаго за адным", пакуль не прыбылі праваахоўнікі, якія і знішчылі ўсіх зламыснікаў.

Мільярдэр падкрэсліў, што "можна сцвярджаць усё, што заўгодна, але калі б у гэтых людзей была зброя, калі б ім было дазволена мець яе пры сабе, то сітуацыя магла б скласціся зусім інакш".

Французскае заканадаўства ў сферы абароту зброі заснавана на Дэкрэце 95-589 ад 6 мая 1995 года. Дэкрэт забараніў у цывільным абароце ўсю вайсковую зброю (як агнястрэльную, так і халодную), а таксама нашэнне пісталетаў і рэвальвераў без асаблівай ліцэнзіі, якая выдаецца выключна ў адмысловых выпадках. Набыццё пісталетаў і рэвальвераў магчыма толькі з дазволу прэфектуры паліцыі або жандармерыі. Ахвочы яго атрымаць павінен зарэгістравацца ў Французскай стралковай федэрацыі, прайсці поўнае медыцынскае абследаванне і паліцэйскую праверку на добранадзейнасць. Дазвол даецца на захоўванне дома ў мэтах самаабароны і дзейнічае тры гады, пасля чаго ўладальнік праходзіць працэдуру наноў, нагадвае lenta.ru.

Адміністрацыя прэзідэнта ЗША Барака Абамы спрабуе дамагчыся ўзмацнення жорсткасці правілаў гандлю агнястрэльнай зброяй у краіне, аднак не можа гэтага зрабіць з-за супраціву амерыканскага "зброевага лобі". Многія праціўнікі абмежаванні правоў на нашэнне зброі належаць да Рэспубліканскай партыі, да іх ліку адносіцца і Дональд Трамп. Мільярдэр раней неаднаразова заяўляў, што і сам у мэтах бяспекі часта носіць з сабой пісталет, паведамляе ТАСС.

У студзені гэтага года палітык таксама звяртаў увагу на строгія французскія законы наконт зброі, калі каментаваў атаку на часопіс Charlie Hebdo, нагадвае ren.tv.

Вядома, што раней Дональд Трамп і Хілары Клінтан выказалі спачуванні Францыі ў сувязі з тэрактамі.