У Еўрапарламенце патрабуюць расследаваць подкуп Расіі палітыкаў ЕС

Чэшскія ўлады заявілі пра раскрыццё схемы подкупу Расіяй еўрапейскіх палітыкаў праз сетку Voice of Europe. Дэпутаты Еўрапарламента патрабуюць правесці расследаванне. У скандале замяшаныя і палітыкі ФРГ, піша Deutsche Welle.

Некалькі дэпутатаў Еўрапейскага парламента ў пятніцу, 29 сакавіка, запатрабавалі правесці расследаванне з нагоды меркаванага подкупу Расіяй еўрапейскіх палітыкаў. Схему такога подкупу, звязаную з сайтам Voice of Europe, выявілі, паводле іх заяў, улады Чэхіі.

Так, кіраўнік фракцыі «Абнаўляючы Еўропу» (Renew Europe), францужанка Валеры Айе ў лісце да кіраўніка ЕП Роберце Метсале запатрабавала правесці «неадкладнае і празрыстае» ўнутранае расследаванне з гэтай нагоды. «Калі дзеючыя дэпутаты Еўрапарламента або кандыдаты на маючых адбыцца выбарах бралі грошы ў расійскага ўрада або ў яго проксі, яны павінны быць выкрытыя і ў дачыненні да іх павінны быць прынятыя меры», — цытуе словы Айе агенцтва AFP. Фракцыя «Абнаўляючы Еўропу» таксама заклікала тэрмінова правесці з гэтай нагоды парламенцкія дэбаты.

А сустаршыня групы «Зялёных», немка Тэры Райнтке назвала тое, што адбываецца, «атакай на самую сутнасць дэмакратыі». «Вось як Уладзімір Пуцін спрабуе пазбегнуць адказнасці за сваю вайну ва Украіне», — сказала яна.

Больш за 300 еўрадэпутатаў падпісалі паштоўкі для беларускіх палітвязняў

Расійская прапаганда і подкуп палітыкаў

Двума днямі раней улады Чэхіі заявілі, што раскрылі «сетку ўплыву, якая фінансуецца з Расіі, якая займалася распаўсюджаннем расійскай прапаганды ў Еўропе і подкупам еўрапейскіх палітыкаў. У той жа дзень падрабязнасці апублікавалі нямецкае выданне Der Spiegel і чэшская газета Denik N. Паводле іх звестак, часткай схемы з'яўляецца навінавы сайт Voice of Europe, а ў цэнтры сеткі знаходзіцца былы лідар прарасійскай украінскай партыі «Апазіцыйная платформа» Віктар Мядзведчук.

На сайце Voice of Europe рэгулярна публікаваліся заклікі еўрапейскіх палітыкаў спыніць дапамогу Украіне. Некаторым аўтарам гэтых заклікаў, як сцвярджае Denik N, за гэта плацілі грошы — у асобных выпадках сувымерныя з выдаткамі на перадвыбарчую агітацыю на выбарах у Еўрапарламент, якія пройдуць у чэрвені. Паводле дадзеных выдання, гаворка ідзе пра палітыкаў з ФРГ, Бельгіі, Францыі, Венгрыі, Нідэрландаў і Польшчы. Канкрэтных імёнаў чэшскія журналісты не называюць, але адзначаюць, што ў тым ліку на сайце публікаваліся інтэрв'ю сябраў правапапулісцкай «Альтэрнатывы для Германіі» (АдГ) — дэпутата Еўрапарламента Максіміліяна Кра і засядаючага ў бундэстагу Пятра Быра.

Прэм'ер-міністр Бельгіі Аляксандэр Дэ Кроа прама заявіў, што Расія звярталася да сяброў Еўрапарламента і плаціла ім за прасоўванне расійскай прапаганды. Гэтыя абвінавачванні пакуль не падмацаваныя сведчаннямі перадачы грошай. Але факт, што ў гэтай справе фігуравалі незадэклараваныя фінансавыя сродкі, ускосна пацвярджаецца вынікамі ператрусаў у Польшчы, у ходзе якіх у аднаго з уладальнікаў сайта Voice of Europe было канфіскавана 48 500 еўра і 36 000 долараў.

Улады ФРГ ужо выказалі сваю занепакоенасць выкрыццямі з Прагі.