Вайна паміж Ізраілем і «Хезбалой» непазбежная?

Ізраіль у найбліжэйшы час можа прыняць рашэнне аб «татальнай» вайне з ліванскай «Хезбалой», у выніку якой «Ліван атрымае сур'ёзны ўдар», піша «Голас Амерыкі». 

Міністр замежных спраў Ізраіля Ізраіль Кац днямі заявіў, што рашэнне аб «татальнай» вайне з ліванскай узброенай групоўкай «Хезбала» будзе прынятае ў найбліжэйшы час. 

У сваю чаргу, прадстаўнікі ўзброеных сіл Ізраіля 18 чэрвеня заявілі, што «аператыўныя планы наступу ў Ліване зацверджаныя і правераныя».

Гэтыя заявы прагучалі на фоне публікацыі «Хезбалой» амаль 10-хвіліннага відэа, якое, як мяркуецца, было знята з беспілотніка. Яно паказвае назіранне за рознымі месцамі і аб'ектамі ў Ізраілі, у тым ліку цывільнымі раёнамі, марскім портам і аэрапортам у горадзе Хайфа, што ў 27 кіламетрах ад ліванскай мяжы.

«Сёння [лідар «Хезбалы» Сайед Хасан] Насрала хваліцца тым, што захапіў парты Хайфы, якімі кіруюць міжнародныя кампаніі з Кітая і Індыі, і пагражае напасці на іх.

Мы вельмі блізкія да рашэння аб змене правілаў у дачыненні да «Хезбалы» і Лівана. У татальнай вайне «Хезбала» будзе знішчаная, а Ліван атрымае сур'ёзны ўдар», — напісаў Кац на сваёй старонцы ў сетцы X.

«Дзяржава Ізраіль заплаціць цану на фронце і на ўнутраных франтах, але з моцнай і адзінай нацыяй і поўнай магутнасцю ЦАХАЛ, Арміяй абароны Ізраіля, мы адновім бяспеку для жыхароў поўначы краіны», — дадаў ён.

Аднак, як тлумачыць CNN, зацвярджэнне аператыўных ваенных планаў яшчэ не азначае, што вайна паміж Ізраілем і «Хезбалой» непазбежная. У той жа час гэта сведчыць аб гатоўнасці Ізраіля да такога развіцця падзей.

Тым часам рэгіён наведвае спецыяльны пасланнік ЗША Амос Хагштэйн, намеснік памочніка прэзідэнта ЗША і старшы дарадца па пытаннях энергетыкі і інвестыцый. Мэта візіту Хагштэйна — не дапусціць эскалацыі канфлікту і знізіць напружанасць паміж Ізраілем і Ліванам.

«За апошнія некалькі тыдняў мы назіраем эскалацыю. І тое, што прэзідэнт Байдэн хоча зрабіць — гэта пазбегнуць далейшай эскалацыі [якая вядзе] да большай вайны», — сказаў Хагштэйн 18 чэрвеня.

Падчас візіту ў Ліван Хагштэйн сустрэўся з часовым прэм'ер-міністрам Лівана Наджыбам Мікаці, які сказаў яму, што «Ліван не імкнецца да эскалацыі», паводле каментарыяў з офіса Мікаці.

Хагштэйн таксама заклікаў ХАМАС прыняць прапанову ЗША аб спыненні агню ў Газе. Паводле яго слоў, гэта таксама паспрыяе паляпшэнню адносін паміж Ізраілем і Ліванам.

Са свайго боку, мэр Хайфы Ёна Яхаў заявіў, што відэа, якое распаўсюдзіла «Хезбала», з'яўляецца «псіхалагічным тэрорам жыхароў Хайфы і поўначы».

«Я патрабую ад урада прадставіць план масіраванай абароны Хайфы і знайсці ваеннае рашэнне для ліквідацыі пагрозы, якая ўзнікла з поўначы», — цытуе CNN словы Яхава.

Па словах «Хезбалы», відэа ўяўляе сабой «першы эпізод», што, магчыма, можа азначаць з'яўленне іншых відэа, зробленых на ізраільскай тэрыторыі ў будучыні.

Нагадаем, «Хезбала» пачала наносіць удары па Ізраілю 8 кастрычніка 2023 года, на наступны дзень пасля таго, як ХАМАС напаў на поўдзень Ізраіля і фактычна пачаў вайну ў Газе.

З тых часоў групоўка выкарыстала больш за 5000 ракет, снарадаў і беспілотнікаў для ўдараў па паўночным Ізраілі, паведамляе CNN. «Хезбала» заяўляе, што здзяйсняе гэтыя напады ў знак салідарнасці з палесцінскім народам — і спыніць агонь толькі пасля таго, як Ізраіль скончыць вайну ў Газе.

Са свайго боку Ізраіль у адказ нанёс сотні ўдараў па Ліване. Каля 60 000 паўночных ізраільцян і больш за 90 000 ліванцаў былі вымушаныя пакінуць свае дамы ў памежных рэгіёнах абедзвюх краін.