ЗША будуць падтрымліваць права Украіны на Крым

У сталіцы Польшчы Варшаве ў нядзелю адбылася сустрэча прэзідэнта Украіны Уладзіміра Зяленскага з віцэ-прэзідэнтам ЗША Майкам Пенсам, паведамляе Радыё Свабода.

Перад пачаткам сустрэчы Пенс заявіў, што Злучаныя Штаты «працягнуць падтрымліваць народ Украіны ў пытаннях бяспекі і тэрытарыяльнай цэласнасці, уключаючы законнае права Украіны на Крым».
Абодва палітыкі раней прынялі ўдзел у мерапрыемствах у сувязі з 80-й гадавінай пачатку Другой сусветнай вайны, якія праходзяць у Польшчы.
Чакалася, што ў Варшаву прыедзе прэзідэнт ЗША Дональд Трамп. Была запланаваная яго сустрэча з прэзідэнтам — першая пасля перамогі Уладзіміра Зяленскага на выбарах. Трамп, аднак, адмяніў візіт з прычыны набліжэння да ўзбярэжжа Флорыды ўрагану «Дорыян».