Арандатарам дадуць адтэрміноўку па выплаце арэнды на дзяржаб'ектах да 30 верасня

Падрыхтаваны праект указа кіраўніка дзяржавы, які прадугледжвае магчымасць прадастаўлення адтэрміноўкі па выплаце арэнднай платы, а таксама мараторый на павелічэнне базавай арэнднай велічыні і арэнднай платы.

Пра гэта гаворыцца на сайце Дзяржаўнага камітэта па маёмасці, паведамляе www.zviazda.by

Дакумент распрацаваны Дзяржкаммаёмасцю і мае на мэце аказаць падтрымку суб'ектам прадпрымальніцтва, што ажыццяўляюць віды эканамічнай дзейнасці, на якія можа аказаць неспрыяльны плыў эпідэміялагічная сітуацыя (турыстычныя і транспартныя паслугі, гасцінічны і санаторны бізнес, грамадскае харчаванне, бытавыя паслугі і іншыя).

Нормы Указа будуць распаўсюджаны на арандатараў (пазыкаатрымальнікаў) нерухомай маёмасці, якая знаходзіцца ў дзяржаўнай уласнасці, а таксама ва ўласнасці гаспадарчых таварыстваў, у статутных фондах, якіх больш за 50 працэнтаў акцый знаходзіцца ва ўласнасці Рэспублікі Беларусь і (або) яе адміністрацыйна-тэрытарыяльных адзінак.

У прыватнасці, праектам Указа прадугледжваецца прадастаўленне па заяве арандатара (пазыкаатрымальніка) нерухомай маёмасці яму да 30 верасня 2020 года адтэрміноўкі па аплаце арэнднай платы за карыстанне такой маёмасцю (кампенсацыі расходаў, звязаных з утрыманнем і эксплуатацыяй гэтай маёмасці).

Арэндадаўцам (пазыкадавальнікам) нерухомай маёмасці пры прадастаўленні арандатарам (пазыкаатрымальнікам) такой адтэрміноўкі таксама прапануецца ўстанавіць адтэрміноўку выканання абавязацельстваў у дачыненні да выплаты арэнднай платы за зямлю, падатку на зямлю, падатку на нерухомасць, што выплачваюцца арэндадаўцам (пазыкадавальнікам) за кошт арэнднай платы (расходаў, якія кампенсуюцца пазыкаатрымальнікамі), з растэрміноўкай выплаты па 31 снежня 2020 года.

Мараторый на павелічэнне базавай арэнднай велічыні і арэнднай платы праектам Указа прадугледжваецца ўвесці на тэрмін да 30 верасня 2020 года.

Акрамя таго, у праекце Указа дзяржаўным юрыдычным асобам дадзена права прадастаўлення пакупнікам дзяржмаёмасці, якія ажыццяўляюць такія «ўразлівыя» віды дзейнасці, а таксама якія аказваюць бытавыя паслугі насельніцтву, да 30 верасня 2020 года адтэрміноўкі па аплаце дзяржаўнай маёмасці, прададзенай з растэрміноўкай яго аплаты.

Адтэрміноўка прадастаўляецца пакупніку на тэрмін, пазначаны ў яго заяве аб прадастаўленні такой адтэрміноўкі. Пагашэнне пакупніком сумы адтэрміноўкі ажыццяўляецца штомесяц роўнымі долямі з 1 кастрычніка 2020 года па 31 снежня 2020 года. Працэнты за карыстанне адтэрміноўкай і растэрміноўкай прапануецца не налічваць.

Дадзены праект Указа ўзгоднены з усімі зацікаўленымі. Пры яго распрацоўцы пад увагу былі прыняты адпаведныя звароты прадпрымальніцкіх структур, у тым ліку калектыўныя.

 Паводле www.zviazda.by