Расійскі суд прыняў рашэнне аб арышце грошай у «Беларусбанку»: ці спрацуе?
Суд у Кузбасе арыштаваў частку выплат па беларускіх еўрааблігацыях на рахунку ў «Беларусбанку». Мера прынята як забеспячальная паводле пазову расійскага прыватнага інвестара, які спаганяе амаль 27 млн расійскіх рублёў па еўрабондах Беларусі.
Арбітражны суд расійскай Кемераўскай вобласці вынес рашэнне аб накладанні арышту на выплаты па беларускіх еўрааблігацыях у адрас расійскага прыватнага інвестара. Арышт накладзены на 964,3 тысячы беларускіх рублёў, якія знаходзяцца або паступяць ад беларускага Мінфіна на рахунак у «Беларусбанк», паведамляе РБК.
Пазоў падаў летам мінулага года інвестар Ігар Пракудзін да Citibank N. A. London Branch, які выступаў агентам па беларускіх еўрабондах і «Беларусбанку». Ён дамагаецца спагнання купонных выплат па аблігацыях, якія яму належаць.
У пачатку ліпеня 2022 года Мінфін Беларусі паведаміў, што Citigroup Global Markets Europe AG і лонданскі філіял Citibank спынілі абслугоўванне еўрааблігацый дзярждоўгу краіны, што стварыла складанасці з правядзеннем плацяжоў па іх. Спачатку міністэрства адзначала, што будзе шукаць новага контрагента, а затым паведаміла, што выплаты па еўрааблігацыях будуць ажыццяўляцца наўпрост у лакальнай інфраструктуры (праз «Беларусбанк») у беларускіх рублях. Па меркаванні буйнейшых рэйтынгавых агенцтваў, гэта азначае дэфолт Беларусі па еўрааблігацыях, бо выплаты па іх павінны праходзіць у той валюце, у якой яны намінаваны.
Праз «Беларусбанк» Мінфін РБ, нібыта, правёў некалькі выплат па чатырох выпусках еўрабондаў: Belarus-2026 ($500 млн), Belarus-2027 ($600 млн), Belarus-2030 ($600 млн) і Belarus-2031 ($750 млн). Яшчэ адзін выпуск, Belarus-2023 на $800 млн, быў пагашаны ў лютым, таксама ў беларускіх рублях.
«Нібыта правёў выплаты» — таму што інвестары гэтых грошай не пабачылі. Для атрымання гэтых выплат расійскім інвестарам прапанавалі адкрыць рахунак у мясцовым банку і пацвердзіць права валодання паперамі ў беларускім Мінфіне. Шэраг інвестараў зрабілі гэтыя працэдуры, але альбо не атрымалі выплат зусім, альбо атрымалі іх у няпоўным аб'ёме і толькі па частцы выпускаў.
Глядзіце таксама
Для вырашэння сітуацыі расійскія інвестары звярнуліся са скаргамі ў Банк Расіі, Міністэрствы фінансаў Расіі і Беларусі, а таксама падалі пазовы ў расійскія суды.
Увосень мінулага года Мінфін Беларусі прапанаваў новую схему з правядзеннем выплат праз расійскі Нацыянальны разліковы дэпазітарый. Аднак па гэтай схеме былі выплачаны толькі купоны і асноўны доўг па выпуску Беларусь-2023, і толькі тым інвестарам, якія набылі паперы да 6 верасня 2022 года. Пры гэтым у далейшым Мінфін збіраецца выплачваць купонны даход разам з пагашэннем еўрааблігацый, і такім чынам уладальнікам каштоўных папер з пагашэннем у 2031 годзе прыйдзецца чакаць грошай да пачатку наступнага дзесяцігоддзя.
У якасці альтэрнатыўных варыянтаў Мінфін Беларусі таксама прапанаваў інвестарам выкупіць іх аблігацыі па цане 30% ад наміналу або абмяняць іх на лакальныя паперы з падобнымі параметрамі.
Пракудзін, па пазове якога расійскі суд арыштаваў сродкі ў «Беларусбанку», спрабуе дамагчыся атрымання купонных выплат па еўрааблігацыях, пералічаных за перыяд з 25 лютага па 12 снежня 2023 года, а таксама працэнтаў за карыстанне грашыма. Спагнаць грошы інвестар хоча з Citibank, а «Беларусбанк» павінен забяспечыць перавод грашовых сродкаў.
«У разгляданым выпадку забеспячальная мера ў выглядзе накладання арышту на грашовыя сродкі ў межах сумы пазову з'яўляецца суразмернай, дастатковай і неабходнай забеспячальнай мерай, накіраванай на рэальнае выкананне выніковага судовага акта ў будучыні, у сувязі з чым заява істца падлягае задавальненню», — цытуе РБК вызначэнне арбітражу.
Пазоў быў разгледжаны 12 студзеня. Наступнае пасяджэнне па ім прызначана на 1 ліпеня.
Пракудзін — не адзіны інвестар, які звярнуўся ў суд з-за беларускіх еўрааблігацый. Аляксандр Марчанкоў таксама спрабаваў дамагчыся выплат на сваю карысць. Аднак летась суд усё ж такі спыніў разгляд справы, спаслаўшыся на непадсуднасць.
Акрамя таго, расійскія інвестары звярталіся ў дзяржорганы, у прыватнасці, яны прасілі спыніць крэдытнае фінансаванне Беларусі да выплат па еўрабондах.
Глядзіце таксама
