Акадэмія навук пратэстуе другі тыдзень. Адміністрацыя кажа пра звальненні (фота)
Супрацоўнікі Нацыянальнай акадэміі навук Беларусі ужо другі тыдзень кожны працоўны дзень у 13.00 выходзяць на ланцуг салідарнасці да прэзідыума ўстановы на праспекце Незалежнасці.
Навукоўцы склалі некалькі лістоў у падтрымку сумленных выбараў і супраць
гвалту. Адміністрацыя акадэміі праводзіць прафілактычныя гутаркі.
Неафіцыйна гучаць размовы пра звальненне супрацоўнікаў пад выглядам
аптымізацыі навуковай установы.
Кожны працоўны дзень навукоўцы з розных інстытутаў у свой абедзенны перапынак збіраюцца ля калон прэзідыума НАН з бел-чырвона-белымі сцягамі і плакатамі, шыхтуюцца ў ланцуг салідарнасці ўздоўж праспекта Незалежнасці.
Афіцыйна кіраўніцтва Акадэміі на гэта ніяк не рэагуе. Але 24 і 25 жніўня прайшлі сходы працоўных калектываў рознага ўзроўню: недзе запрасілі цэлыя інстытуты, недзе – лабараторыі; “пашанцавала” і асобным актывістам. Кажуць, што наўпростых пагроз падчас такіх гутарках не гучыць, аднак адміністрацыя паведамляе, што на восень плануецца атэстацыя ўсяго працоўнага калектыва Акадэміі навук, а па выніках атэстацыі – аптымізацыя. У беларускіх рэаліях аптымізацыя – гэта звальненні. Гучаць намёкі, што звольняць акурат супрацоўнікаў, якія падпісвалі лісты і выходзяць на ланцугі салідарнасці.
Сёння ля прэзідыума НАН сабралася больш за 150 чалавек. Гэта не толькі супрацоўнікі, шмат людзей прыйшло падтрымаць навукоўцаў на заклік, змешчаны на Тэлеграм-канале Nexta. Два супрацоўнікі міліцыі ў камізэльках з надпісам “Ахова” час ад часу казалі ў мегафон, што мерапрыемства несанкцыянаванае і прасілі разысціся. Людзі ў цывільным здымалі пратэстоўцаў на камеры. Нікога не затрымлівалі.
Даследчыкі плануюць працягваць акцыі салідарнасці кожны працоўны дзень у 13.00. Калона навукоўцаў удзельнічала таксама ў агульнанацыянальных маршах 16 і 23 жніўня.
Фота аўтаркі
