Беларускі дыпламат у Кіеве спрабаваў выклікаць супраць пікетоўцаў паліцыю

Кіеўскія анархісты пікетавалі сёння амбасаду Беларусі ва Украіне. Акцыя адбылася ў знак салідарнасці з актывістамі, затрыманымі падчас «Маршу недармаедаў» у Мінску.

Анархісты прынцыпова не паведамлялі пра акцыю паліцыю, у выніку чаго адбыўся канфлікт з аховай амбасады. Да пікетоўцаў выйшаў беларускі дыпламат, які прадставіўся «саветнікам у пытаннях бяспекі» і заявіў, што акцыя «несанкцыяваная».

У адказ пратэстоўцы заявілі, што ва Украіне вулічныя акцыі не патрэбна санкцыянаваць.

«Тут вам не Беларусь. Мы не баімся!» — запярэчыў яму адзін з удзельнікаў.

Пасля гэтага анархісты пачалі задаваць пытанні наконт затрыманых у Мінску. Супрацоўнік амбасады праігнараваў пытанні і вярнуўся ў будынак, каб выклікаць паліцыю. Аднак да канца акцыі яна так і не прыехала.

Ва Украіне, каб арганізаваць мірную акцыю, непатрэбны дазвол уладаў. Дастаткова заявіць пра яе правядзенне ў паліцыю альбо гарадскім уладам.

Анархісты скандавалі: «Усе рэпрэсіі — дарма» і «Свабоду ўдзельнікам сацыяльнага маршу!». Акцыя працягвалася каля 20 хвілінаў.
www.svaboda.org