Былая працаўніца МТЗ Улляна Гарбачова, якая эмігравала праз пераслед, напісала ліст Ілану Маску
Дзяўчына распавяла амерыканскаму прадпрымальніку і мільярдэру пра свае прыгоды і прапанавала ўзяць яе на працу ў адну з яго кампаній.
Улляна Гарбачова
З вясны гэтага года былая машыністка крана МТЗ Улляна Гарбачова разам з васьмігадовым сынам жыве ва Украіне. У Беларусі яна трапіла пад пераслед праз сваю актыўнасць падчас пратэстаў. Але і ў вымушанай эміграцыі Улляна зазнала цяжкасці, у тым ліку адносна працы. Таму дзяўчына вырашыла паспытаць шчасця і звярнуцца наўпрост да амерыканскага тэхналагічнага магната Ілана Маска.
Улляна даслала яму ліст на электронную пошту, а пазней апублікавала яго ў Твітары.
Вось што піша Ілану Маску Улляна Гарбачова:
«Прывітанне Ілан,
Мой электронны ліст можа здацца Вам незвычайным, і, шчыра кажучы, я менавіта гэтага і дамагаюся.
Мяне клічуць Улляна, я з Беларусі. Я нарадзілася і вырасла ў Мінску, працавала на Мінскім трактарным заводзе. Спачатку я працавала штампоўшчыкам. Пазней я прайшла навучанне на МТЗ і стала машыністам крана. Усяго на Мінскім трактарным заводзе я прапрацавала 12 гадоў: адзін год штампоўшчыкам, астатнія кранаўшчыком.
Маё жыццё было цудоўным, па меншай меры, да прэзідэнцкіх выбараў у Беларусі ў 2020 годзе і наступных масавых акцый пратэсту. Думаю, Вы ведаеце пра сітуацыю ў маёй роднай краіне, таму няма сэнсу апісваць яе яшчэ раз. Для тых, хто аспрэчваў фальсіфікацыі вынікаў выбараў, было важна хоць бы паспрабаваць распачаць страйк, таму я стала членам страйкавага камітэта на сваім прадпрыемстве. Нягледзячы на тое, што я была адным з лепшых выканаўцаў у маім падраздзяленні, мяне звольнілі. Пазней мяне таксама затрымалі за ўдзел у акцыях пратэсту.
У сакавіку 2021 года я была вымушаная пакінуць Беларусь. Калі б я не з'ехала, я б аказалася палітычнай зняволенай, а ў Беларусі ўжо 700+ (на момант публікацыі — больш за 800. — НЧ) чалавек, якія былі змешчаныя ў турму па тых жа прычынах. Такім чынам, я апынулася ў Кіеве (Украіна), а затым пераехала ў Адэсу, украінскі горад на беразе Чорнага мора.
Я разведзеная і самастойна выхоўваю 8-гадовага сына.
У цяперашні час працую ў Адэсе кранаўшчыком. Наогул раней я працавала на маставым кране, а цяпер працую на казлавым.
А цяпер дазвольце мне перайсці да сутнасці майго ліста да Вас, Ілан. Мне вельмі хацелася б папрацаваць кранаўшчыком на адным з Вашых прадпрыемстваў у Амерыцы. Я захапляюся Вамі і тым, чым займаецца Ваш бізнес, і я была б шчаслівая мець магчымасць унесці хоць бы найменшы ўклад у поспех адной з Вашых кампаній. Я адказны чалавек і хутка навучаюся. Я даволі добра размаўляю па-англійску. Цалкам упэўненая, што Вы не пашкадуеце, што нанялі такога чалавека, як я!
На жаль, большасць маіх знаёмых не вераць, што я змагу знайсці працу ў Вашай кампаніі. Але я працягваю верыць у цуды. У рэшце рэшт, у чым сэнс жыцця, калі вы ні ў што не верыце?!
З нецярплівасцю чакаю Вашага адказу.
З найлепшымі пажаданнямі,
Улляна Гарбачова
P.S.: Я таксама прыклала пару спасылак на свае інтэрв'ю і паведамленні ў СМІ пра мяне».
Скрыншоты з твітара Улляны Гарбачовай