Чарговая зачыстка медцэнтраў. Мінздароўя прыпыніла дзеянне ліцэнзій яшчэ трох устаноў

Міністэрства аховы здароўя 16 лістапада прыпыніла дзеянне ліцэнзій ТДА «Медыцынскі цэнтр «Кравіра», ТАА «Доктар Нэма», ТАА «ПлеядаМед» (Dental Clinic). Прычынай называюцца выяўленыя парушэнні.


Дзеянне ліцэнзій медцэнтраў прыпынена да ліквідацыі парушэнняў. Рашэнне ўступае ў сілу 28 лістапада.

Так у медцэнтры «Кравіра» ўстаноўлены грубыя парушэнні ліцэнзійных патрабаванняў і ўмоў у частцы адсутнасці медыцынскай дакументацыі, дагавораў на тэхнічнае абслугоўванне медыцынскай тэхнікі, выкарыстання незарэгістраванай медыцынскай тэхнікі.

Таксама там зафіксаваны факты невыканання клінічных пратаколаў дыягностыкі і лячэння, зацверджаных Міністэрствам аховы здароўя, у тым ліку службай анестэзіялогіі і рэанімацыі, а менавіта выяўлены факты аказання медыцынскай дапамогі з парушэннямі, якія з'яўляюцца вельмі значнымі і могуць пацягнуць, а магчыма пацягнулі, прычыненне шкоды жыццю і здароўю, што характарызуе медыцынскую дапамогу як небяспечную. Арганізацыя медыцынскай дапамогі ў гэтым цэнтры стварае рэальную пагрозу жыццю пацыентаў пры магчымым развіцці ўскладненняў у раннім пасляаперацыйным перыядзе, гаворыцца ў паведамленні Мінздароўя.

Зафіксаваны ️парушэнні ў правядзенні медыцынскіх аглядаў, арганізацыі і правядзенні экспертызы часовай непрацаздольнасці;

  • парушэнні ў арганізацыі і аказанні неадкладнай медыцынскай дапамогі;
  • парушэнні ў сферы абарачэння лекавых сродкаў, а менавіта неналежнага іх захоўвання;
  • парушэнні санітарна-эпідэміялагічных патрабаванняў, санітарных нормаў, правіл і гігіенічных нарматываў, у тым ліку парушэнні пры правядзенні стэрылізацыі эндаскапічнага абсталявання.

У ТАА «Доктар Нэма» зафіксаваны: грубыя парушэнні ліцэнзійных патрабаванняў і ўмоў у частцы адсутнасці медыцынскай дакументацыі, дагавораў на тэхнічнае абслугоўванне медыцынскай тэхнікі; парушэнні санітарна-эпідэміялагічных патрабаванняў, санітарных нормаў, правіл і гігіенічных нарматываў.

У ТАА «ПлеядаМед»(Dental Clinic):

  • устанаўленне факта выканання віду работ, не заяўленых у ліцэнзіі;
  • парушэнні патрабаванняў да займання пасад (выкананне работ спецыялістам не па сваёй спецыяльнасці і кваліфікацыі);
  • парушэнні санітарна-эпідэміялагічных патрабаванняў, санітарных нормаў, правіл і гігіенічных нарматываў (у частцы правядзення дэзінфекцыі, стэрылізацыі, устаноўлены факты паўторнага прымянення аднаразовых медвырабаў, выкарыстання для лячэння нестэрыльных медвырабаў і інш.);
  • грубыя парушэнні ліцэнзійных патрабаванняў і ўмоў у частцы адсутнасці медыцынскай дакументацыі, дагавораў на тэхнічнае абслугоўванне медыцынскай тэхнікі, выкарыстання незарэгістраванай медыцынскай тэхнікі, лекаў і методык.

Названыя парушэнні ў ТДА «Медыцынскі цэнтр «Кравіра», ТАА «Доктар Нэма», ТАА «ПлеядаМед» (Dental Clinic) маглі выклікаць прычыненне шкоды дзяржаўным ці грамадскім інтарэсам, жыццю, здароўю, правам і законным інтарэсам грамадзян або стварыць пагрозу прычынення такой шкоды, падкрэслівае Мінздароўя.

Варта зазначыць, што з такой жа фармулёўкай зачыняліся і іншыя прыватныя медычныя ўстановы, напрыклад, «Ладэ». А потым быў пазбаўлены ліцэнзіі «Нардзін».

Рэпрэсіі ў дачыненні да прыватных медцэнтраў многія звязваюць з тым, што яны аказвалі бясплатную дапамогу пацярпелым ад міліцэйскага гвалту пасля 9 жніўня 2020 года.


Пры гэтым спецыялісты канстатуюць высокі адток медыкаў з краіны.




Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: