Еўрасаюз: «Вінаватыя павінны быць прыцягнутыя да адказнасці»

ЕС падтрымае Міжнародную платформу для Беларусі дзеля прыцягнення вінаватых да адказнасці. ЕС і міжнародныя партнёры ўзначальваюць барацьбу з беспакаранасцю беларускіх улад.

Еўрасаюз плануе падтрымаць Міжнародную платформу для Беларусі палітычна і фінансава, паведамляе «Белсат».

Вярхоўны прадстаўнік ЕС па пытаннях замежнай палітыкі і палітыкі бяспекі Жазэп Барэль заявіў:

«Пасля фальсіфікацыі прэзідэнцкіх выбараў сем месяцаў таму ўлады Беларусі здзейснілі непрымальныя парушэнні правоў чалавека ў дачыненні беларускага народа. На масавую мірную мабілізацыю беларускага грамадства, якое выступае за дэмакратыю і свае асноўныя свабоды, улады адказалі жорсткімі рэпрэсіямі, незаконнымі арыштамі і затрыманнямі, сотнямі задакументаваных выпадкаў катаванняў ды іншых жорсткіх, бесчалавечных або прыніжальных годнасць відаў абыходжання і пакарання, уключаючы сексуальны і гендарны гвалт».

Барэль назваў затрыманні ўдзельнікаў пратэстаў 25 сакавіка несправакаванымі ды незаконнымі і падкрэсліў, што гэтыя дзеянні — маштабныя дзяржаўныя рэпрэсіі, якія не змяншаюцца.

«Вінаватыя павінны быць прыцягнутыя да адказнасці», — адзначыў палітык.

Паводле Барэля, ЕС і міжнародныя партнёры ўзначальваюць барацьбу з беспакаранасцю.

Акрамя падтрымання працы міжнароднай платформы, на гэтым тыдні Рада ААН у справе правоў чалавека ўхваліла прапанаваную ЕС рэзалюцыю адносна сітуацыі ў Беларусі. Гэты дакумент дае мандат вярхоўнаму камісару ААН у справе правоў чалавека для збору інфармацыі пра парушэнні ў Беларусі.

Барэль падкрэсліў, што ў сваёй працы вярхоўны камісар ААН будзе карыстацца дакументацыяй, сабранай міжнароднай платформай.