Хронікі рэпрэсій. Яшчэ два прысуды па «справе Зельцэра», перапынак у судзе над прафсаюзнымі актывістамі

З дапамогай інфармацыі праваабаронцаў сабралі звесткі пра палітычны пераслед беларусаў 8 снежня.

_cihi_supraciu__fota_dzmitryeu_dzmitryj_novy_czas__8__logo_1.jpg

У Мінскім гарадскім судзе асудзілі палітзняволенага Аляксандра Лобана паводле ч. 1 арт. 130 («Распальванне іншай сацыяльнай варожасці») Крымінальнага кодэкса.

Суддзя Жанна Брысіна асудзіла Аляксандра на 1 год і 9 месяцаў пазбаўлення волі ў калоніі ва ўмовах агульнага рэжыму. Пасяджэнне праходзіла ў закрытым рэжыме.

Аляксандр на момант прысуду адбыў прызначаны тэрмін у СІЗА, таму яго выпусцілі на волю ў зале суда.

У Гомельскім абласным судзе асудзілі палітзняволенага Руслана Асятрова паводле ч. 1 арт. 130 («Распальванне іншай сацыяльнай варожасці») КК. Суддзя Аляксей Хлышчанкоў прызначыў мужчыну два з паловай гады пазбаўлення волі ў калоніі ва ўмовах агульнага рэжыму.

Руслана затрымалі 29 верасня 2021 года па крымінальнай справе, узбуджанай за каментары ў інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зельцэра.

У судзе над актывістамі беларускіх незалежных прафсаюзаў — палітвязнямі Генадзем Фядынічам, Васілём Берасневым і Вацлавам Арэшкам абвешчаны перапынак да панядзелка, 12 снежня.

Іх абвінавачваюць у «закліках да мер абмежавальнага характару, накіраваных на прычыненне шкоды нацыянальнай бяспецы Рэспублікі Беларусь» (ч. 3 арт. 361 КК), «распальванні іншай сацыяльнай варожасці» (ч. 3 арт. 130 КК), «стварэнні экстрэмісцкага фарміравання альбо ўдзеле ў ім» (ч. 1 і ч. 3 арт. 361-1 КК).

Справу разглядае суддзя Анастасія Папко, дзяржабвінаваўца — пракурор Раман Бізюк.

Суд Партызанскага раёна Мінска завяршыў разгляд крымінальнай справы 53-гадовага жыхара сталіцы Вадзіма Калініна. Яго абвінавацілі ў абразе Аляксандра Лукашэнкі паводле ч.1 арт. 368 КК. Судовы працэс вяла суддзя Наталля Дзядкова.

Згодна з прад’яўленым абвінавачаннем Вадзім у лютым 2022 года пакінуў у сацыяльнай сетцы «Instagram» пад публікацыяй у акаўнце «minsk_news» з выявай Лукашэнкі каментар абразлівага характару ў ягоны адрас.

Суд прызначыў Калініну пакаранне ў выглядзе пазбаўлення волі на тэрмін адзін год з адбываннем у папраўчай калоніі ва ўмовах агульнага рэжыму.

Выйшаў на волю адзін з самых пажылых палітвязняў — 70-гадовы берасцеец Віталь Зарадзей.

Віталь — былы вайсковец, ліквідатар аварыі на ЧАЭС. У Берасці ён быў вядомы тым, што пісаў звароты да ўлад.

29 сакавіка 2021 года да яго дамоў уварваліся людзі з аўтаматамі. Віталя затрымалі і асудзілі да двух гадоў пазбаўлення волі за «абразу суддзі і абразу прэзідэнта».

Суддзя па справе — Вадзім Здановіч, які часта вядзе палітычна-матываваныя працэсы. У 2017 годзе ён прысудзіў вялікія штрафы журналістам «Б*лсата» Алесю Леўчуку і Мілане Харытонавай.

Віталя Зарадзея абвінавацілі ў тым, што ён падаваў у канцылярыі судоў позвы, дзе, паводле экспертыз, «дапускаў негатыўную ацэнку» суддзяў і Лукашэнкі. Сілавікі налічылі 7 такіх «правапарушэнняў». Даведацца, якімі ж словамі Віталь пакрыўдзіў Лукашэнку і суддзяў, не давялося: гэтую частку суда закрылі.

Пакаранне Віталь Зарадзей адбываў у шклоўскай калоніі №17.