Тысячы! Праваабаронцы сабралі лічбы пра беларускіх палітвязняў (інфаграфіка)
Калі пісаць па лісту на дзень да кожнага палітзняволенага, чалавеку спатрэбіцца 4 гады і 40 дзён. Да Дня палітвязняў праваабаронцы прыводзяць жахлівыя лічбы па сітуацыі з палітычнымі зняволенымі за тры гады бесперапынных рэпрэсій.
Тысячы чалавек прайшлі праз зняволенне, дзясяткі тысяч беларусаў былі вымушаны пакінуць краіну праз рэпрэсіі. Па інфармацыі праваабаронцаў, агулам амаль за тры гады з крымінальным пераследам сутыкнуліся не меней за 4300 чалавек. Проста цяпер у зняволенні ў жудасных умовах утрымліваюцца не менш за 1525 палітзняволеных.
З таго часу праз амаль тры гады праваабаронцамі было прызнана палітзняволенымі яшчэ 2290 чалавек. Агулам былі праваабаронцамі прынятыя 302 заявы аб прызнанні людзей палітычнымі зняволенымі, і ў кожнай з іх вылучаецца патрабаванне спыніць палітычныя рэпрэсіі.
На 21 траўня 2023 года ў Беларусі налічваецца 1525 палітзняволеных, кожная 10-я з якіх — жанчына. Усе яны ўтрымліваюцца ў нечалавечых умовах. Палітвязняў фактычна ўтрымліваюць у рэжыме «інкамунікада», не аказваюць медыцынскую дапамогу, пазбаўляюць права на абарону, закідваюць у карцары і штрафныя ізалятары, дзе створаны спецыяльныя ўмовы, якія самі палітвязні называюць катавальнымі.
Сваякі і блізкія людзі некаторых вязняў месяцамі не атрымліваюць звестак пра стан іх родных. Дзясяткі чалавек знаходзяцца ў зняволенні з сур'ёзнымі захворваннямі, таму прызначаныя тэрміны могуць стаць для іх пажыццёвымі, як гэта здарылася з хворым на сэрца Мікалаем Клімовічам, які 5 траўня памёр у віцебскай калоніі № 3.
На сёння ў месцах несвабоды ўтрымліваюцца дзевяць падлеткаў, якім на момант затрымання не было 18 гадоў: Мікіта Залатароў, Сяргей Гацкевіч, Эдуард Кудынюк, Максім Імхавік, Іван Пацяйчук, Дзяніс Хазей, Аляксандр Вінярскі, Павел Піскун, а таксама Арцём Вайцяховіч, якому яшчэ няма нават 16 гадоў.
З 2020 года з крымінальным пераследам па палітычных матывах сутыкнуліся не меней за 4300 чалавек. Праваабаронцам вядома пра мінімум 854 чалавекі, якія былі асуджаны беларускімі суддзямі да «хатняй хіміі».
Наўпрост цяпер у папраўчых установах адкрытага тыпу («хімія») знаходзяцца 254 палітычныя вязні. Вядома, што там на іх аказваецца ціск: да іх прыязджаюць сілавікі, правяраюць тэлефоны, збіваюць, адпраўляюць на «суткі», а супраць некаторых пасля гэтага ўзбуджаюць новыя крымінальныя справы.
Сумны факт: 4 гады і 40 дзён спатрэбіцца чалавеку, калі пісаць па лісту на дзень да кожнага палітзняволенага.