Інвалід, які ў Беразіне здымаў на відэа сілавікоў, а потым апынуўся ў рэанімацыі, — былы «афганец» (абноўлена)

Праваабаронцы паведамляюць пра чарговы выпадак, які дасканала характарызуе як сённяшніх беларускіх міліцыянтаў, так і агульную сітуацыю з законнасцю ў краіне.

Праваабаронцам стала вядома пра выпадак, які адбыўся 9 сакавіка ў горадзе Беразіно Мінскай вобласці. Як паведамляюць сведкі, мясцовы жыхар Уладзімір Панцюх на аўтавакзале пачаў здымаць дзеянні супрацоўнікаў ДАІ, якія правяралі маршруткі. Мужчына палічыў, што даішнікі паводзілі сябе нахабна і хамілі кіроўцам. Як толькі супрацоўнікі ўбачылі тэлефон, адразу падбеглі, павалілі мужчыну на зямлю і павезлі яго ў аддзел.

Паводле інфармацыі праваабаронцаў, праз гадзіну Уладзіміра прывезлі ў рэанімацыю з сардэчным прыступам і слядамі збіцця. Зараз мужчына знаходзіцца ў бальніцы пад канвоем.

Затрыманы мае трэцюю групу інваліднасці, у яго чатыры перанесеныя інфаркты і тры аперацыі шунтавання. Нягледзячы на ўсе гэта, Уладзіміра Панцюха плануюць судзіць — але па якім артыкуле, пакуль невядома.

Насуперак сведкам затрымання, версія інцыдэнту ў сілавікоў іншая — нібыта Уладзімір у нецвярозым стане распачаў бойку на вакзале, за што і быў затрыманы.

Гвалт і тэрор як метад падтрымання стабільнасці

Праверка маршрутак, якію ладзілі даішнікі, імаверна, была звязана са страшнай аўтааварыяй пад Смалявічамі 20 лютага. У выніку сутыкнення маршруткі і МАЗа загінулі 11 чалавек, 9 чалавек трапілі ў бальніцы. Кіроўца МАЗа быў затрыманы. Пасля гэтага ўлады пачалі правяраць маршруткі на наяўнасць сродкаў бяспекі.

Варта таксама дадаць, што апошнімі днямі сілавікі актыўна кашмараць беларусаў у розных гарадах і нават вёсках. Адпаведны загад ім у духу гітлераўскіх нацыстаў часоў Другой сусветнай вайны даў асабіста Лукашэнка. Ён так і сказаў: правесці па ўсёй краіне «жэстачайшую зачыстку».

«А ім я хачу сказаць, каб яны рыхтаваліся. Мы ўжо да іх ідзем. Нашы хлопцы ўжо на парозе, хай рыхтуюцца. Лепшы варыянт — калі яны прыйдуць самі: рукі ўверх, прыйдуць і здадуцца. Гэта будзе для іх выратаванне. Мы іх вылічым усіх. Вычысцім проста з нашага грамадства», — заявіў Лукашэнка, маючы на ўвазе сваіх палітычных апанентаў і проста нязгодных з ягонай дыктатарскай палітыкай.

Шэраг скандальных заяваў Лукашэнка зрабіў 7 сакавіка на цырымоніі ўручэння дзяржаўных узнагарод. Бяскрыўднае, здавалася б, мерапрыемства пераўтварылася ў гучны стэндап, цягам якога Лукашэнка на мяжы істэрыкі «выкрываў» удзельнікаў дыверсіі на ваенным аэрадроме ў Мачулішчах.

Прэзідэнта Украіны Уладзіміра Зяленскага ён тады некалькі разоў назваў «гнідай».

UPD. Стала вядома, што збіты пасля затрымання ў Беразіне 53-гадовы Уладзімір Панцюх з'яўляецца ветэранам Афганскай вайны. Пра гэта паведаміў тэлеграм-канал «Б*ларусь галаўнога мозга». На той вайне Уладзімір быў двойчы паранены і кантужаны. Пасля дэмабілізацыі жыў у Расіі ў пасёлку Беларускі недалёка ад Ніжневартаўска. У Беларусь вярнуўся ў 1992 годзе.