Кранальная сустрэча Леаніда Кулакова (фота)

З ізалятара на Акрэсціна выйшаў актывіст Леанід Кулакоў, які правёў за кратамі 25 сутак. Гэта рэкордны тэрмін па адміністратыўнай справе, які атрымлівалі ўдзельнікі сакавіцкіх пратэстаў.

Сустрэць актывіста да сценаў ізалятара прыйшлі сябры, паплечнікі ды актывісты, агулам каля 15 чалавек. Леанід выйшаў на волю з амаль “біблійнай” барадой, стомлены, але ў добрым настроі. Яго затрымалі 25 сакавіка на падыходах да месца правядзення мітынгу ды звінавацілі ў двух артыкулах: 23.4 і 23.34 адміністратыўнага кодэксу.

Подпіс да малюнка (калі не змяняць, подпіс будзе выдалены аўтаматычна)

“Я прадчуваў, што так будзе, — распавядае Кулакоў, — але не мог па-іншаму: мусіў быць побач з людзьмі… Чаму шмат далі? Мабыць таму, што ў судзе міліцыянту, які выступаў сведкам, я прапанаваў паклясціся здароўем Лукашэнкі ў тым, што ён кажа праўду. Той адмовіўся. Магчыма, суд менавіта на гэта так адрэагаваў”.

Праз праблемы са страўнікам актывіст падчас зняволення еў толькі кашы. Змесціва перадачак, якія яму даходзілі, з большага раздаваў сярод сукамернікаў — “не палітычных”. Аніводнага ліста ці паштоўкі яму не дайшло, нягледзячы на тое, што знаёмыя рабілі спробы даслаць Кулакову вестачку “з волі”.

Турэмная бірка