Літва абвінаваціла беларускіх памежнікаў у пашкоджанні агароджы дзеля дапамогі мігрантам (відэа)

Літоўскія памежнікі знялі на відэа спробу мігрантаў перайсці беларуска-літоўскую мяжу. Дапамагаюць ім у гэтым невядомыя ў масках, якія разразаюць агароджу нажніцамі для металу.

Відэа, знятае 11 верасня ў Віленскім раёне, апублікавала Delfi. На ім відаць, як двое невядомых у камуфляжы і ў масках падбягаюць да плота, які знаходзіцца на літоўскім баку, і рэжуць дрот.

«Няма сумненняў у тым, што гэта беларускія служачыя або іх падапечныя», — мяркуюць у Службе аховы дзяржмяжы Літвы.

На відэа бачна, як да плота падыходзіць група людзей з заплечнікамі. Пасля таго як з'яўляецца літоўскі патруль, усе ўцякаюць і хаваюцца на беларускім баку.

У другой частцы відэа паказаны беларускія памежнікі, якія ідуць уздоўж мяжы на беларускім баку. Адзін з іх нясе нажніцы для рэзкі металу.