Мінадукацыі Беларусі не адмовілася ад зменаў у польскіх школах

Ліст з адмовай на скаргу 380-ці бацькоў вучняў польскай школы №36 у Гродна прыйшоў некалькі дзён таму.

На бацькоўскім сходзе было вырашана, што бацькі не пагодзяцца з гэтым рашэннем і будуць пісаць скаргі ва ўсе іншыя магчымыя інстанцыі.

Бацька аднаго з вучняў польскай школы Веслаў Кеўляк распавядае:

— Нас вельмі непакояць папраўкі, якія плануецца ўвесці ў Кодэкс аб адукацыі Рэспублікі Беларусь, — гэта перавод выкладання пяці прадметаў з польскай мовы на беларускую, а таксама экзамены вучні будуць здаваць ужо не на польскай мове, а на беларускай або рускай. Гэта вельмі балючыя папраўкі, бо адразу паўстае пытанне пра мэтазгоднасць навучання на польскай мове. Гэта парушае нашы правы як нацыянальнай меншасці.

Гэтым разам бацькі вучняў гродзенскай польскай школы плануюць аб’яднацца з бацькамі польскай школы ў Ваўкавыску і дзвюма літоўскімі школамі.

Таксама бацькі нагадваюць, што згодна з польска-беларускімі дамовамі, польская школа ў Гродна будавалася за польскія грошы дзеля адукацыі на польскай мове, чаму супярэчаць планаваныя змены ў Кодэксе аб адукацыі.

Кася Бергель, Беларускае Радыё Рацыя

Фота аўтара