Палітвязня Уладзіміра Гундара пачнуць судзіць 18 траўня

Суд над палітычным зняволеным Уладзімірам Гундарам пачнецца 18 траўня. Працэс будзе праходзіць дыстанцыйна.

Палітвязня затрымалі па «справе Аўтуховіча» нібыта за падрыхтоўку тэракта. Уладзімір Гундар мае інваліднасць другой групы — у яго няма нагі.

Спачатку Уладзіміра Гундара вінавацілі ў тэрарызме, але пазней гэты артыкул быў зняты. Цяпер Уладзіміру ставіцца ў віну ч. 1 арт. 285 (стварэнне злачыннай арганізацыі) і ч. 2 арт. 357 (замах на захоп дзяржаўнай улады неканстытуцыйным шляхам).

Увесь час у зняволенні на Гундара аказваецца ціск. Яго змяшчаюць у карцар, а аднойчы падчас этапу прымусілі ісці без мыліц.

«Міліцыянты скулі яму рукі за спінай кайданкамі, забралі мыліцы і сказалі, што на загад следчага КДБ ён мусіць дабірацца да аўтамабіля самастойна. Уявіце: без нагі, без мыліцаў, з рукамі за спінай у кайданках», — паведамлялі сваякі.