Рэжым працягвае спробы дыскрэдытаваць Валерыя Сахашчыка. Цяпер няўклюдна выдаюць яго за «агентуру»

4 кастрычніка ў рэдакцыю «З*ркала» невядомы даслаў фатаграфію дакумента аб узнагароджанні Валерыя Сахашчыка нагрудным знакам ад Упраўлення ваеннай контрвыведкі КДБ РБ. Выданне звязалася з прадстаўніком Аб'яднанага кабінета па абароне і нацбяспецы.

dokument_o_yakoby_nagrazhdenii_valeriya_sakhashchika_.jpeg

Фатаграфію даслалі з акаўнта, зарэгістраванага на нумар з кодам +316. Гэта код Гуама — выспы Марыянскага архіпелага ў заходняй частцы Ціхага акіяна, ён належыць ЗША, хоць і не ўваходзіць у іх.

На фатаграфіі — пасведчанне № 033 ад Упраўлення ваеннай контрвыведкі КДБ Беларусь, выдадзенае нібыта Валерыю Сцяпанавічу Сахашчыку. У ім значыцца, што ўладальнік пасведчання ўзнагароджаны нагрудным знакам «За ўзаемадзеянне» загадам ад 14 снежня 2016 года. На той момант Валерый Сахашчык ужо 14 гадоў быў у запасе.

— Нічога агульнага з КДБ я ніколі не меў. Тут нават няма чаго каментаваць. Проста намалявалі — і ўсё, — сказаў Сахашчык.

— То бок гэты дакумент — падробка?

— Безумоўна. Я ніколі нічога агульнага не меў з КДБ, мяне ніхто ніколі не ўзнагароджваў. Гэта поўнае глупства.

Сахашчык кажа, што да падобных укідаў ставіцца як да «непазбежных наступстваў таго, чым займаецца».

— Трэба людзям мяне неяк трывожыць і выводзіць са стану душэўнай раўнавагі. Не ведаю, напэўна, частка якой-небудзь псіхалагічнай аперацыі, — сказаў ён.

Нагадаем, у першай палове верасня стала вядома, што Валерый Сахашчык з 1992 года мае расійскае грамадзянства. Заяўлялася, што ён «атрымаў яго аўтаматам», бо ў той час «служыў пад юрысдыкцыяй Расіі».

Сам Валерый Сахашчык распавядаў, што карыстаўся расійскім пашпартам, калі працаваў у краінах Афрыкі, бо ён дазваляў уязджаць у большасць краін без віз, у адрозненне ад беларускага. Аднак перастаў карыстацца дакументам пасля таго, як скончыўся афрыканскі этап яго жыцця.

22 верасня Сахашчык адправіў у амбасаду Расіі ў Польшчы дакументы з адмовай ад расійскага грамадзянства.

— Хачу яшчэ раз падкрэсліць, што асуджаю агрэсію Расіі супраць Украіны, жадаю ўкраінскаму народу найхутчэйшай перамогі. Слава Украіне! Жыве Беларусь! — заявіў прадстаўнік Кабінета падчас здымкі відэа на парозе аддзялення пошты ў Варшаве.