У Мінску жорсткія затрыманні, страляніна, выбухі. Вось так праходзіць марш супраць тэрору (фота, відэа)
Гэтым разам марш пойдзе ў Курапаты.
У нядзелю 1 лістапада ў Мінску адбываецца мірны марш пратэсту супраць тэрору ўлады. Марш спалучаны з шэсцем "Дзяды" ў Курапаты, якое традыцыйна адбывалася ў першую нядзелю лістапада. Месца збору: метро Парк Чалюскінцаў. Маршрут марша: Метро Парк Чалюскінцаў - праспект Незалежнасці - Каліноўскага - Карбышава - Гамарніка - Мірашнічэнка - урочышча Курапаты.
Раніцай улады агародзілі плошчу Незалежнасці, стэлу і Кастрычніцкую плошчу, у цэнтр горада была сцягнута вайсковая тэхніка. А 12й гадзіне пачаліся перабоі з мабільным інтэрнэтам, пазней зачынілі станцыі метро Акадэмія Навук, Парк Чалюскінцаў і Маскоўская.
«Белсат» вядзе жывую трансляцыю.
18:20 У Мінску запрацаваў мабільны інтэрнэт.
Яшчэ адно відэа з'явілася з разгону людзей у полі ля Экспабела. На ім бачна, як сілавікі шмат разоў страляюць у паветра і не даюць людзям адбіваць тых, каго затрымліваюць.
17:50 Паціху людзі пачынаюць разыходзіцца з Курапатаў. За імі сочаць супрацоўнікі ДПС і стаіць некалькі бусікаў.
Сілавікі спрабуюць затрымаць мужчыну: пырскаюць пярцовым газам з балончыка і збіваюць яго дручкамі. Але жанчыны яго адбіваюць!
17:30 Людзі ўсё яшчэ ідуць у Курапаты. Падымаюцца да асноўнага мемарыяла праз жывы калідор, які пратэстоўцы ўтварылі абапал сцежкі, стаўшы плячом да пляча і ўзняўшы нацыянальныя сцягі.
Наверсе, ля цэнтральнага мемарыяла, спяваюць песні, гучалі і «Муры».
Бачна, што многія ў Курапатах упершыню.
Шмат людзей усё яшчэ ля «Экспабела», недалёка ад Курапатаў.
На Мірашнічэнка пачалі зноў затрымліваць людзей. Сілавікі спрабуюць іх дагнаць у дварах.
17:20 Людзі тым часам працягваюць ісьці ў Курапаты
17:05 Фантастычны момант на вуліцы Каліноўскага. Сілавік настаўляе стрэльбу на пратэстоўцу, а той не проста не адступае, а расшпільвае куртку і падымае футболку: страляй! У гэты момант зусім побач іншы чалавек у вайсковай форме страляе ў паветра.
Але бясстрашнага пратэстоўцу гэта не спыняе. Ён не ўзброены, але працягвае ісці наперад, наўпрост на стрэльбу сілавіка ў хакі, пакуль яго не адцягваюць іншыя пратэстоўцы.
Яшчэ адзін цікавы момант. Сілавікі сінхронна ўпалі падчас пагоні за пратэстоўцам.
16:55 У дварах на Мірашнічэнкі працягваецца хапун. Нягледзячы на ўсе перашкоды сілавікоў, людзі прарваліся ў Курапаты
Нясуць кветкі і запальваюць зьнічкі на месцы расстрэлаў часоў сталінскіх рэпрэсіяў. Невялікім струменем людзі яшчэ ідуць па полі ў Курапаты.
Лукашэнка пагражаў «адрываць рукі» пратэстоўцам, яны адказалі крэатывам
16:45 Сілавікі прыехалі на вайсковых машынах па МКАД, выгрузіліся і пачалі адцясняць і разганяць пратэстоўцаў, якія стаялі на Мірашнічэнка.
16:40 Проста цяпер у Курапатах сотні людзей. Асобныя калоны яшчэ толькі падыходзяць, зараз шмат дэманстрантаў ля «Экспабела».
Калі сілавікі перакрылі праход да Курапат па Мірашнічэнкі праз МКАД, людзі проста пайшлі ва ўрочышча полем
16:15 У раёне МКАД – Мірашнічэнкі сілавікі ўжылі супраць дэманстрантаў святлошумавую гранату, таксама чуваць стрэлы. Людзе пачалі затрымліваць проста ў полі каля Курапат. Некаторыя пасьпяваюць дабегчы да «Экспабелу».
16:00 Людзі і сілавікі
Адна з калон ужо пераходзіць пераход да Курапатаў
15:55 Па дарозе Калодзішчы-Заслаўе, аўтобусы, адзін вадамёт, хуткая і калючы дрот. Едуць у бок Курапатаў.
15:50 На Лагойскім тракце сілавікі ўзарвалі адну святлошумавую гранату.
Адчынены ўсе станцыі метро.
15:40 Асноўная частка калоны "Усход" перамясцілася з Каліноўскага на Кедышкі. Жыхары мікрараёна трымаюць дзверы пад'ездаў адчыненымі. На Лагойскім тракце чуваць выбухі сьвятлашумавых гранат
15:30 На Карбышава вялікі затор, упіраецца ў Лагойскі тракт. Аўтобусы выпускаюць пасажыраў, людзі ідуць да тракце пешшу, крычаць «Жыве Беларусь». Іх, размахваючы сцягамі, вітаю жыхары дамоў.
На вуліцы Сядых збіраецца ўсё больш пратэстуючых, сілавікі адыходзяць.
На Каліноўскага ля храма Усіх святых групіруюцца сілавікі, чуўся стрэл з помпавага ружжа. Перад гэтым людзі суправаджалі іх з паднятымі рукамі і скандаваннем «Ён вас кіне!»
Сюды таксама пад’ехаў вадамёт
15:20 дна з калёнаў, што ідзе па Каліноўскага, пачала выходзіць на праезную частку — на ходніках усе не зьмяшчаюцца. У бок Уручча паехала спэцтэхніка, машыны з калючым дротам, аўтазакі, нават адна хуткая. На Усходзе сілавікі спрабавалі павярнуць, каб дагнаць калону пратэстуючых, але аўтамабілісты заблакавалі рух.
На Каліноўскага прыбылі аўтазакі, высадзіліся сілавікі. Хвост калоны адразу перамясціўся ў двары. Многія адышлі ў бок Сляпянскай воднай сістэмы. Аўтамабілісты спрабуюць заблакаваць рух аўтазакаў. Дэманстрантаў тут дзясяткі тысяч
15:10 Цяпер адна калёна ідзе па вуліцы Каліноўскага ад праспэкту Незалежнасьці, другая — па Валгаградзкай у бок Лагойскага тракту
15:00 Галава асноўнай калоны дэманстрантаў зараз ля скрыжавання з вуліцай Каліноўскага ля метро Усход. Хвост — ля метро Маскоўская. Калона нераўнамерная, людзі ідуць групкамі. Агулам у шэсці ўжо бярэ ўдзел каля 20 тысяч дэманстрантаў
Зброя супраць мірных людзей.
14:55 Яшчэ адна калона каля метро Ўсход.
Вось так адбываліся затрыманні і разгон.
14:50 Па вуліцы Кедышкі рухаецца вялікая калона дэманстрантаў.
14:40 За калонай на Валгаградскай рушылі сілавікі.
Каля 10 тысяч дэманстрантаў сабралася між праспектам Незалежнасці і вуліцай Кедышкі проці метро Усход. Калона сфарміравалася на вуліцы Кедышкі. З Філімонава да іх пад'ехала калона бусаў.
Вялікія групы людзей працягваюць рух па праспекце Незалежнасці. Зараз яны праходзяць скрыжаванне з вуліцай Філімонава. Ідуць па тратуарах ранейшым маршрутам моўчкі і без сцягоў.
14:35 Разгон ля станцыі метро «Маскоўская». Ідуць затрыманні. Людзі разбягаюцца хто куды. З двароў на праспэкце Незалежнасьці выбягаюць людзі — магчыма, там затрыманьні
Тысячы людзей цяпер ідуць па ходніках. Калёна з аўтазакаў і бусаў з АМАП едзе разам зь імі па праспэкце Незалежнасьці. Людзі выгукваюць «Красавцы» і «Пошел вон, ты и твой ОМОН». За будынкам Беларусьфільма ізноў стаіць ланцуг АМАП. Калёна Маршу спынілася — вырашаюць, што рабіць
Частка калоны заблакаваная на ўчастку ад Валгаградскай да БЦ «Аляксандраў пасаж». Калона разгарнулася і ідзе да Акадэміі навук.
14:30 Сілавікі сталі ў ланцуг на праспекце, дэманстранты абыходзяць іх па тратуары, скандуюць «Фашысты!». Ззаду калоны дэманстрантаў з бусаў выйшлі, імаверна, супрацоўнікі ГУБАЗіКа, апранутыя па-спартыўнаму з дубінкамі ў руках. За скрыжаваннем з вуліцай Макаёнка дзве калоны дэманстрантаў, якія рухаліся па тратуарах, аб’ядналіся зноў у адну вялікую калону і рушаць далей па праезнай частцы. Сілавікі едуць паволі ззаду
14:25 Людзі абыходзяць ланцуг АМАП па ходніках, некаторыя стаяць перад шэрагам АМАП з узьнятымі рукамі, жанчыны зь бел-чырвона-белымі парасонамі. Ззаду калёну Марша насьцігаюць два ланцугі АМАП. Людзі сыходзяць з праспэкту. Затрыманьняў пакуль няма.
14:20 Насупраць заводу «Луч» спынілася машына ДАІ, яна не прапускае аўтамабілі па праспекце Незалежнасці ў бок «Усходу». Машыны разгортваюцца і з'язджаюць у бок Акадэміі навук. З аўтамабіля ДАІ раздаецца папярэджанне, каб людзі пакінулі праезную частку. З боку метро «Маскоўская» даносіцца папярэджанне МУС аб парушэнні заканадаўства і воплескі, падобныя на стрэлы.
Аўтамабільны рух перакрыты ад скрыжаваньня праспэкту Незалежнасьці з вуліцай Натуралістаў (паміж будынкамі БАТУ і дзіцячай чыгункай
Людзі вышлі на праспэкт. Тут каля 5 тысяч удзельнікаў. У калёне ёсьць чорны сьцяг анархістаў. Наперадзе іх чакае ланцуг з амапацаў, які перагарадзіў праспэкт. Калёна Маршу набліжаецца да АМАП, людзі крычаць «Пошел вон, ты и твой ОМОН». Праз мэгафон людзей папярэджваюць, што акцыя несанкцыянаваная. Гучаць стрэлы ў паветра. Людзі ў выніку сышлі з праспэкту
14:10 Калёна ў некалькіх тысяч чалавек рушыла па праспэкце Незалежнасьці ад Парку Чалюскінцаў у бок Курапат. Вялікая калона пратэстоўцаў выйшла са сквера Талбухіна на праспект Незалежнасці і заняла праезную частку. Шмат бел-чырвона-белых сцягоў.
14:00 Людзі пакрысе збіраюцца. Каля Парка Чалюскінцаў затрымалі журналіста ТАСС Юрыя Шамшура, пазней яго адпусцілі.
Людзі невялікімі калонамі ідуць па праспекце Незалежнасці да заводу «Луч», і ўжо некалькі сотняў чалавек сабраліся на бульвары Талбухіна. Як распавядае адзін мужчына, да яго на бульвары падышлі два паставых міліцыянта ў форме.
- Я проста сядзеў на лавачцы, піў колу, яны падышлі і кажуць: «Калі вы хочаце правесці гэты вечар дома, вам варта сысці адсюль - на бульвары будуць мерапрыемствы. Калі не хочаце, працягвайце тут сядзець». Тое ж самае яны сказалі і бацькам, якія з дзецьмі збіралі лісце на бульвары, - распавёў мужчына.
