У Мінску пачалі вакцынаваць ад каронавіруса педагогаў

У Мінску пачалася вакцынацыя ад каронавіруса педагагічных работнікаў. Пра гэта заявіла перад калегіяй камітэта па ахове здароўя Мінгарвыканкама намесніца міністра аховы здароўя Алена Богдан.

«У краіне працягваецца вакцынацыя работнікаў медыцынскай сферы, нядаўна пачалі прышчапляць педагогаў і неўзабаве пяройдзем да сацыяльных работнікаў і людзей, якія знаходзяцца ў дамах-інтэрнатах», — цытуе Богдан REFORM.by.

Першымі вакцыну ў Беларусі атрымалі медыцынскія работнікі. Прышчэпкі пакуль робяцца расійскім прэпаратам «Спутник V».

Масавую вакцынацыю плануецца пачаць у красавіку па меры напрацоўкі партый вакцыны айчыннай вытворчасці. У сакавіку стартаваў разліў валідацыйных партый прэпарата.