Улады плануюць увесці крымінальную адказнасць за ўдзел у незарэгістраваных і ліквідаваных арганізацыях

А таксама нельга збіраць грошы на штрафы і не толькі.

Сёння ў першым і другім чытаннях дэпутаты прынялі змяненні ў Адміністрацыйны і Крымінальны кодэксы, наступны этап — іх павінны падпісаць Савет Рэспублікі і Аляксандр Лукашэнка.

Паводле змен, за ўдзел у ліквідаваных арганізацыях цяпер будзе прадугледжана крымінальная адказнасць, паведамляе «Зялёны партал» са спасылкай на прэс-службу Палаты прадстаўнікоў.

Гаворка ідзе пра крымінальную адказнасць за арганізацыю дзейнасці альбо ўдзел у дзейнасці:

— палітычнай партыі;

— іншага грамадскага аб'яднання;

— рэлігійнай арганізацыі;

— фонду,

у дачыненні да якіх маецца рашэнне ўпаўнаважанага дзяржаўнага органа аб ліквідацыі або прыпыненні дзейнасці, што ўступіла ў законную сілу.

Такая ж адказнасць за арганізацыю іх дзейнасці альбо ўдзел у дзейнасці тых жа суб'ектаў, якія не прайшлі дзяржаўную рэгістрацыю.

Адміністрацыйная адказнасць прапанавана за парушэнне закона «Аб масавых мерапрыемствах», а менавіта:

— забарона на збор;

— атрыманне;

— выкарыстанне грашовых сродкаў;

— маёмасць;

— выкананне работ;

— ці нават аказання паслуг для пакрыцця выдаткаў, якія адбыліся з-за таго, што чалавека прыцягнулі да адказнасці за парушэнне парадку арганізацыі або правядзення масавых мерапрыемстваў.

У 2020-2021 гадах прайшла масавая ліквідацыя грамадскіх арганізацый, уключаючы як праваабарончыя, так і экалагічныя, культурныя, сацыяльныя ці спартыўныя. Колькасць ліквідаваных арганізацый — 306, а тых, якія правялі самаліквідацыю, — 187.