Віталь Рымашэўскі: калі ўлады не сустрэнуць супраціву, паборы будуць толькі расці

У Мінску, Гародні, Магілёве беларускія хрысціянскія дэмакраты пачалі кампанію за адмену дэкрэта № 3 аб «дармаедах». Да яе ўжо далучаюцца прадстаўнікі Бабруйшчыны, Гомельшчыны, Берасцейшчыны, Міншчыны і Віцебшчыны.

Пра гэта паведаміў сустаршыня БХД Віталь Рымашэўскі. У межах кампаніі запланаваныя збор подпісаў і правядзенне масавых акцый — пікетаў і дэманстрацый па ўсёй краіне.
«Дэкрэт аб «дармаедах» антыканстытуцыйны і парушае правы грамадзян Беларусі. Адзіная яго мэта — новыя паборы з і так збяднелага насельніцтва. Але спыніць рабаўніцтва і па гэтым дэкрэце, і ва ўсіх іншых выпадках можна будзе толькі тады, калі беларусы навучацца адстойваць свае правы. Пакуль жа, не сустракаючы супраціву, улады будуць дзейнічаць па-старому і толькі павялічваць паборы. З усіх рэгіёнаў ідуць скаргі, людзі абураюцца, але наколькі яны здолеюць дзейнічаць салідарна, каб абараніць сябе і свае сем'і, і пакажа гэтая кампанія», — адзначыў сустаршыня БХД.
Віталь Рымашэўскі заклікаў усіх неабыякавых грамадзян Беларусі далучацца да кампаніі. «Сённяшнія падаткавікі дзейнічаюць, як злачынцы, як апрычнікі, даводзячы людзей да самагубства, як гэта было ў Гомелі, каб усімі сродкамі сабраць грошы грамадзян на ўтрыманне чыноўнікаў», — дадаў ён.
bchd.info