Мастацкі савет Мінгарвыканкама ўхваліў устаноўку ў Мінску памятнай дошкі ў гонар абвяшчэння БНР
Актывісты хочуць павесіць яе на будынак па вуліцы Валадарскага, дзе была абвешчаная рэспубліка, але ўлады пакуль марудзілі з дазволам.
Памятная дошка ў майстэрні. Здымак «Радыё Свабода»
«Паседжаньне мастацкага савета пры выканкаме адбылося, ён ухваліў ўсталяванне дошкі. Калі ў нас будзе на руках рашэнне Мінгарвыканкама, мы паведамім пра дату і час ўстаноўкі памятнай дошкі», — перадае БелаПАН словы кіраўніка БНФ Рыгора Кастусёва.
Сродкі на выраб памятнай дошкі сабралі за некалькі гадзін. Планавалася, што яе ўсталююць да 25 сакавіка, але ўладамі неафіцыйна было сказана, што «трэба рабіць усё па законе, каб былі праведзены ўсе працэдуры». Запланаваная дата ўстаноўкі некалькі разоў пераносілася, і калі гэтая падзея можа адбыцца, па-ранейшаму невядома.
Паводле naviny.by