Еўрасаюз: нерэгулярная міграцыя не можа быць прадметам гандлю

Сёння прадстаўніцтва Еўрасаюза ў Беларусі заявіла дэмарш Міністэрству замежных спраў краіны ў сувязі з мігрантамі.

Еўрапейская служба знешніх дзеянняў лічыць, што 50-кратнае павелічэнне колькасці спробаў перасячэння мяжы з Беларусі ў краіны Еўрасаюза не з’яўляецца вынікам няздольнасці беларускіх уладаў выконваць свае абавязацельствы па барацьбе з незаконнай міграцыяй, піша REFORM.by.

«Для такога рэзкага росту колькасці нелегальных пераходаў мяжы на разгляданым маршруце няма аб’ектыўных прычын. ЕС асуджае выкарыстанне мігрантаў у палітычных мэтах і настойліва заклікае ўлады Беларусі спыніць гэтую практыку» — гаворыцца ў заяве Еўрапейскай службы замежных дзеянняў.

У ёй таксама падкрэсліваецца, што нерэгулярная міграцыя не можа быць прадметам гандлю. ЕС заклікае беларускія ўлады спыніць рэпрэсіі, забяспечыць інклюзіўны палітычны працэс і свабодныя выбары. Менавіта гэтыя дзеянні стануць падставай для зняцця санкцый і нармалізацыі стасункаў.

«Нерэгулярная міграцыя не можа быць прадметам гандлю. З кастрычніка 2020 года, калі Савет ЕС прыняў высновы аб сітуацыі ў Беларусі, улады Беларусі цалкам дасведчаныя аб паступовым падыходзе ЕС да ўжывання санкцый і пра ўмовы зняцця Еўрапейскім саюзам абмежавальных мер і нармалізацыі адносін. Еўрапейскі Саюз па-ранейшаму гатовы істотна нарасціць палітычнае ўзаемадзеянне, галіновае супрацоўніцтва, а таксама фінансавую дапамогу Беларусі пры ўмове, што яе ўлады спыняць рэпрэсіі, забяспечаць сур’ёзны, годны даверу і інклюзіўны палітычны працэс, у выніку якога адбудуцца свабодныя і справядлівыя выбары пад наглядам БДІПЧ АБСЕ, а таксама гарантуюць захаванне вяршэнства права і правоў чалавека», — гаворыцца ў заяве.