Магілёў. Праваабаронца абскардзіць адмову чыноўнікаў выконваць пастанову ЦВК

Адмова членаў Магілёўскага аблвыканкама і прэзідыума Магілёўскага аблсавету дэпутатаў абмяркоўваць прэтэндэнтаў у склад камісій і галасаваць па кожнай кандыдатуры персанальна з'яўляецца грубым парушэннем выбарчага заканадаўства, лічыць магілёўскі праваабаронца Барыс Бухель.

27 чэрвеня ў Магілёве былі створаны Магілёўская абласная і 13 акруговых выбарчых камісій. Галасаванне праходзіла спісамі па кожнай камісіі. Барыс Бухель быў вылучаны ў склад абласной камісіі шляхам збору подпісаў выбаршчыкаў, аднак чыноўнікі без якіх-небудзь абмеркаванняў адмовіліся туды яго ўключаць.
Праваабаронца, спасылаючыся на рашэнне ЦВК, папрасіў растлумачыць па кожнай персаналіі прычыны ўключэння ці неўключэння ў склад камісіі. Аднак старшыня Магілёўскага аблвыканкама Уладзімір Даманеўскі адмовіўся рабіць гэта на пасяджэнні.
Згодна пункту 6 пастановы №18 Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў ад 8 чэрвеня 2016 года датычна пасяджэнняў па ўтварэнні выбарчых камісій, "перад прыняццем рашэння аб фарміраванні выбарчай камісіі выносіцца на абмеркаванне пытанне аб дзелавых і палітычных якасцях асоб, вылучаных у склад камісіі, а калі колькасць прэтэндэнтаў у склад выбарчай камісіі перавышае колькасць прадугледжаных членаў камісіі, заслухоўваецца інфармацыя па кожнай кандыдатуры і праводзіцца персанальнае галасаванне".
"Буду пісаць скаргу на ўчарашняе пасяджэнне ў Цэнтрвыбаркам. У яго пастанове дакладна прапісана — персанальна кожнага разбіраць. Тое, што адбылося ўчора ў Магілёве, — гэта прамое і грубае парушэнне ўказання ЦВК", — заявіў Барыс Бухель.
Разам з тым ён адзначыў, што магілёўскія абласныя чыноўнікі прыслухаліся да яго ўчорашняга патрабавання ўказваць час і месца правядзення першых пасяджэнняў акруговых камісій. Так, у цяперашні час на сайце Магілёўскага аблвыканкама размешчаны графік правядзення першых арганізацыйных пасяджэнняў абласной і акруговых выбарчых камісій у рэгіёне. Згодна з ім, яны будуць праходзіць на працягу 28-29 чэрвеня. Там жа згадваецца час і месца іх правядзення. Падобная інфармацыя адсутнічае на сайтах іншых аблвыканкамаў і Мінскага гарвыканкама.
“Праваабаронцы за свабодныя выбары”