Наступ Расіі на Кіеў магчымы ў двух выпадках: ва ўкраінскім МУС патлумачылі ролю Беларусі

Расійскія войскі могуць аднавіць наступ на Кіеў пры двух умовах. Важную ролю ў патэнцыйнай атацы РФ адыгрывае Беларусь. Пра гэта заявіў дарадца міністра ўнутраных спраў Украіны Вадзім Дзенісенка ў інтэрв'ю РБК-Украіна.

«Першы выпадак — калі Лукашэнка згаджаецца запусціць сюды беларускае войска, пакуль ён «віхляе» і такога дабра не даў. Другі — калі Лукашэнка не згаджаецца, то ў гэтым выпадку наступ на Кіеў магчымы толькі пасля таго, як будзе цалкам знішчаная ўкраінская групоўка на Усходзе Украіны», — падкрэсліў Дзенісенка.

Ён адзначыў, што цяпер Беларусь вельмі важная для Крамля, паколькі яе магчымае ўварванне ва Украіну адцягне ўвагу часткі ўкраінскіх вайскоўцаў ад Усходняга фронту і створыць пагрозу наступу на Чарнігаў або Кіеў.

Як вядома, Беларусь працягвае адпраўляць Расіі боепрыпасы, праводзіць працяглыя вайсковыя вучэнні на мяжы з Украінай. У краіне абвешчаныя вайсковыя зборы ля мяжы з Украінай, грамадзянам уручаюць позвы.

У апошнія дні актыўна распаўсюджваецца інфармацыя аб тым, што, магчыма, будзе новы наступ на Украіну, на гэты раз — з боку Узброеных сіл Беларусі.

У прыватнасці, Генштаб УСУ паведамляў, што з боку Беларусі на Валынскім і Палескім напрамках магчымыя правакацыі.

Зрэшты, па словах дарадцы старшыні ОПУ Аляксея Арастовіча, баяцца нападу з боку Беларусі не варта. Іншы дарадца кіраўніка Офіса прэзідэнта Украіны Міхаіл Падаляк выказваў меркаванне, што чуткі пра напад Беларусі з'яўляюцца нічым іншым, як чарговай спекуляцыяй расійскай прапаганды з мэтай пасеяць паніку ва Украіне.

Паводле unian.net.