«Ты хацеў СССР, Ваня? Ну, вось ён». Гучны скандал у РФ з аблавай на хакеіста і яго дастаўкай у ваенкамат

Напярэдадні быў затрыманы крымінальным вышукам і дастаўлены ў ваенкамат 25-гадовы брамнік зборнай Расіі па хакеі Іван Фядотаў, «лепшы галкіпер КХЛ», уладальнік прэстыжных спартыўных узнагарод.

Ён хацеў вылецець у ЗША — у клуб НХЛ «Філадэльфія», з якім падпісаў кантракт. Але на яго зладзілі цэлую аблаву, у якой удзельнічалі дзясяткі сілавікоў. Спартоўца падазраюць ва ўхіленні ад войска, што пагражае яму двума гадамі пазбаўлення волі.

У ваенкамаце Фядотаву стала дрэнна, і ў ноч на 2 ліпеня яго забралі адтуль на «Хуткай».

— Нябось здзівіўся. Пры тым што сам нядаўна выходзіў гуляць супраць фінаў у майцы з надпісам «СССР», — каментуе сітуацыю публіцыст Віктар Шэндэровіч. — Проста ён думаў, што горш ад гэтага прывіда мінулага будзе чамусьці менавіта фінам. Ці нічога не думаў, а проста надзеў, што далі. А яно вунь як атрымалася.

Ты хацеў СССР, Ваня? Ну, вось ён. Прыглядзіся.

Ён, відаць, добры хлопец, гэты Іван Фядотаў. Ён малады і не памятае ніякага часу, акрамя пуцінскага. Ён яму, напэўна, падабаўся да нядаўняга часу. Цяпер, напэўна, разпадабаўся ненадоўга...

Вядома, ненадоўга!

Адпусцяць яго. Ён жа не Кара-Мурза, не Навальны. Хто-небудзь куды-небудзь патэлефануе (хоць той жа дэпутат Фяцісаў, які адкінуў калісьці канькі ў тым жа ЦСКА — і па-ціхаму зліняў у суседні з Філадэльфіяй штат у часы, калі свабода толькі пачыналася, а не сканчалася). Патэлефануе — і вырвецца Фядотаў на волю, і як страшны сон будзе ўспамінаць перспектыву асабіста і бясплатна паваяваць з Украінай.

Ды і якая ад яго карысць на фронце, ён і ў танк не ўлезе са сваімі габарытамі, і трапіць у гэтыя 202 см можна з любой адлегласці, толькі ўжо не шайбай.

Няхай ужо ляціць, я лічу, не будзем настойваць на прынцыповасці, а будзем спадзявацца на карупцыю. Няхай вайсковая братва дамовіцца між сабой па паняццях і адаб'е гэтае лядовае пабоішча ад святога абавязку...

Але вось маечку з надпісам «СССР», Ваня, апранаць усё ж такі не варта было. На сабе не паказвай, як гаворыцца.

Паводле «Салідарнасці».