У Алеся Макаева канфіскавалі маёмасць

Судовыя выканаўцы Савецкага раёну Мінска прыйшлі ў кватэру сустаршыні руху салідарнасці «Разам» Алеся Макаева, каб перапісаць маёмасць. Па словах Макаева, яго маёмасць збіраюцца канфіскаваць за няплату штрафаў, выпісаных раней за ўдзел у палітычных акцыях.​

«Тут некалькі судовых прыставаў, два ўчастковыя, — распавядае Макаеў. — Прыйшлі, дзіця пабудзілі — хоць бы за 5 хвілін папярэдзілі! Сабраліся б, я б нікуды не ўцёк. Прасілі падпісаць пратаколы, але я нічога не буду падпісваць. Яны тут апісваюць маёмасць — прымач, пасудамыйку, пральную машыну, я не ведаю, што яшчэ. Сказалі, усё бяруць».

Судовыя выканаўцы адмовіліся даць камэнтар Радыё Свабода. Як паведаміла жонка Макаева Юлія Сцяпанава, яны забралі ў Алеся Макаева пральную і пасудамыйную машыны, тэлевізар, мікрахвалёвую печ, вэнтылятар.

Увесну ў Алеся Макаева ўжо канфіскоўвалі частку маёмасці: адміністратары «Ракаўскага кірмашу» забралі тавары (у асноўным сантэхніку) на суму 47 млн недэнамінаваных рублёў, якімі Макаеў гандляваў як прадпрымальнік.

Макаеў браў удзел у шэрагу палітычных акцыяў, як Дзень Волі і Беларускі нацыянальны кангрэс у Мінску, ладзіў акцыі ў падтрымку прадпрымальнікаў супраць указу № 222 у Мінску і іншых гарадах Беларусі.

Паводле Радыё Свабода