Дуда прапануе Украіне падпісаць новае пагадненне аб добрасуседстве
Прэзідэнт Польшчы Анджэй Дуда лічыць, што настаў час падпісаць новае пагадненне аб добрасуседстве, якое «будзе ўлічваць тое, што мы пабудавалі ў нашых адносінах, па меншай меры за апошнія месяцы». Гэта было агучана падчас яго сённяшняга выступу ў Вярхоўнай Радзе Украіны.
Дэпутаты стоячы віталі польскага лідара апладысментамі, прагучаў гімн Польшчы, адзначае REFORM.by.
«Свабодны свет мае твар Украіны», — заявіў Дуда.
«Раздаваліся трывожныя галасы, што Украіна павінна саступіць патрабаванням Пуціна. Толькі Украіна мае права вырашаць сваю будучыню», — прыводзіць яго словы Офіс прэзідэнта Польшчы.
Са слоў Дуды, расійская агрэсія паказала, што сетка аўтамабільных, чыгуначных і інфраструктурных сувязяў паміж Украінай і Польшчай недастатковая, і гэта неабходна выправіць.
«Польска-ўкраінская мяжа павінна аб'ядноўваць, а не падзяляць», — сказаў ён і падкрэсліў, што праявай добрых польска-ўкраінскіх адносін стане хуткаснае чыгуначнае паведамленне паміж Кіевам і Варшавай.
«Мы пабудуем яго разам», — запэўніў ён.
У той жа час Уладзімір Зяленскі, выступаючы ў Радзе, паведаміў, што Украіна і Польшча дамовіліся спрасціць перасячэнне межаў.
«Амаль усе нашы гарады з'яўляюцца пабрацімамі польскіх. Пабрацімамі з'яўляюцца і нашы народы. Сёстрамі з'яўляюцца нашы краіны. Мы родныя. І паміж намі не павінна быць межаў або бар'ераў. Украінскі і польскі народы ментальна даўно не падзяляюць. Таму мы прыйшлі да згоды ў бліжэйшы час увасобіць гэта ў адпаведным двухбаковым пагадненні. Спачатку адносна агульнага памежна-мытнага кантролю, а пасля і адзінай ужо ўмоўнай мяжы, калі Украіна будзе сябрам Еўрапейскага саюза», — сказаў ён.
Зяленскі таксама паведаміў аб падпісанні ўказа № 355/2022 аб устанаўленні Ганаровага знака адрознення «Горад-збаўца», і першым гэты знак атрымаў польскі Жэшув.
У праграме візіту прэзідэнта Анджэя Дуды таксама запланаваны перамовы сам-насам з прэзідэнтам Украіны Уладзімірам Зяленскім. Таксама запланаваны перамовы дэлегацый.
Прэзідэнта Польшчы суправаджаюць кіраўнік Бюро нацыянальнай бяспекі Павел Салох, кіраўнік Бюро міжнароднай палітыкі Якуб Кумоч і дзяржсакратар Канцылярыі прэзідэнта Польшчы, міністр Войцэх Калярскі.
Гэта трэці за апошні час візіт прэзідэнта Польшчы ва Украіну. Анджэй Дуда адправіўся ў Кіеў 23 лютага гэтага года, за дзень да расійскага ўварвання ва Украіну. Затым 13 красавіка ён нанёс яшчэ адзін візіт. Разам з прэзідэнтамі Літвы, Латвіі і Эстоніі ён наведаў Бучу, Ірпень і Барадзянку пад Кіевам.