Джонсан маўчыць, але ўжо можа афіцыйна балатавацца на пасаду прэм'ера Вялікабрытаніі

Бітва за вольную пасля адстаўкі Ліз Трас пасаду прэм'ер-міністра Брытаніі разгортваецца. Афіцыйна аб намеры балатавацца пакуль абвясціла толькі лідар Палаты абшчын Пені Мардонт. Фаварыты — былы прэм'ер-міністр Борыс Джонсан і міністр фінансаў у яго ўрадзе Рышы Сунак — маўчаць, хоць і Джонсана, і Сунака ўжо падтрымалі мінімальна неабходныя 100 дэпутатаў.

Паводле Бі-бі-сі, да дзвюх гадзін дня суботы аб падтрымцы Сунака, спаборніка Трас у фінале нядаўніх выбараў лідара Кансерватыўнай партыі і прэм'ера, заявілі ўжо 112 дэпутатаў Палаты абшчын ад партыі Торы.

Каб паскорыць абранне новага лідара пасля раптоўнага сыходу толькі што абранай Трас, партыя гэтым разам увяла вельмі высокі прахадны бар'ер: балатавацца змогуць толькі тыя, хто заручыцца падтрымкай мінімум ста членаў фракцыі Торы ў Палаце абшчын.

Усяго ў кансерватыўнай партыі цяпер 357 мандатаў у ніжняй палаце парламента, і, адпаведна, вылучыцца змогуць не больш за тры кандыдаты.

У суботу раніцай экс-прэм'ер Джонсан прыляцеў у Лондан з Дамініканскай Рэспублікі, дзе адпачываў з сям'ёй. Як паведамляюць відавочцы, ён прыбыў хоць і ў атачэнні аховы, але эканом-класам. Заяў адразу пасля прылёту ён рабіць не стаў.

Пені Мардонт пакуль падтрымаў 21 дэпутат. Будучы аўтсайдарам, яна тым не менш стала першай і пакуль адзінай з прэтэндэнтаў, хто афіцыйна заявіў пра намер балатавацца. Яна нават ужо выпусціла першы перадвыбарчы ролік для радавых членаў партыі, якім, магчыма, прыйдзецца галасаваць у канцы працэсу выбараў.

Рышы Сунак таксама пакуль нічога не сказаў журналістам, якія чакалі яго раніцай каля дома. Аднак па даных крыніц, ён неўзабаве абвесціць пра намер балатавацца ў лідары.

Месца прэм'ер-міністра Брытаніі вызвалілася на гэтым тыдні пасля таго, як Ліз трас пасля ўсяго шасці тыдняў на пасадзе падала ў адстаўку праз правал першых жа яе крокаў у эканамічнай палітыцы.

Новага лідара партыі і прэм'ера кансерватары маюць намер абраць да наступнай пятніцы, 28 кастрычніка.

Прэм’ер-міністр Вялікабрытаніі Борыс Джонсан наведаў трэніровачны лагер Украінцаў у Ёркшыры

Якія шанцы Джонсана?

Пакуль ён яшчэ не заявіў афіцыйна аб жаданні балатавацца, але 100 галасоў, неабходныя для таго, каб быць упісаным у бюлетэнь, ён ужо набраў. Палітолагі лічаць, што, нягледзячы на нядаўні скандальны сыход з пасады прэм'ера, шанцы ў яго нядрэнныя.

У Джонсана ў партыі даволі шмат прыхільнікаў. З іншага боку, менавіта вярхушка партыі фактычна выгнала яго з пасады прэм'ера гэтым летам — на думку апанентаў Джонсана, з-за скандалаў і абвінавачанняў у хлусні на публіцы ён стаў клопатам для партыі, і з ім наступныя выбары кансерватарам не выйграць.

Гэтыя абвінавачанні навісаюць над Джонсанам і цяпер: парламент працягвае расследаванне пытання, ці не схлусіў Джонсан свядома ў Палаце абшчын, адмахваючыся ад абвінавачанняў з нагоды «кавідных вечарынак» на Даўнінг Стрыт. Па выніках гэтага расследавання дэпутацкія паўнамоцтвы Джонсана могуць быць прыпыненыя ці нават ануляваныя, а гэта неймаверна для прэм'ер-міністра.