Францыя. Следчыя патрабуюць пазбавіць Ле Пен дэпутацкага імунітэту

Раней лідар "Нацыянальнага фронту" адмовілася паўстаць перад следчымі, каб даць паказанні, бо абароненая парламенцкай недатыкальнасцю.

Французскія судовыя следчыя, што вядуць справу пра магчымы крадзеж лідарам "Нацыянальнага фронту" Марын Ле Пен фінансавых сродкаў Еўрапейскага парламента, запатрабавалі пазбавіць яе парламенцкага імунітэту. Пра гэта паведамілі газета “Le Figaro” і радыёстанцыя “France Info”.

Як адзначае радыёстанцыя, "гэта рашэнне стала рэакцыяй суддзяў на заяву Ле Пен пра тое, што яна не мае намеру з'яўляцца па іх выкліку для дачы паказанняў, бо абароненая парламенцкай недатыкальнасцю". Паводле дадзеных СМІ, следчыя накіравалі запыты ў Еўрапарламент 29 і 30 сакавіка адносна Ле Пен і дэпутата ад яе партыі Мары-Крысцін Бутанэ, якая таксама адмовілася паўстаць перад следчымі.

Ле Пен і Бутанэ падазраюцца ў тым, што выплачвалі грошы асобам, аформленым як іх парламенцкія памочнікі, але на самай справе працавалі выключна на партыю "Нацыянальны фронт" і амаль не з'яўляліся ў Страсбургу. Абодвум палітыкам прад'яўленыя абвінавачванні ў злоўжыванні даверам.

Як адзначае радыёстанцыя “France Info”, галасаванне па пытанні пазбаўлення дэпутацкай недатыкальнасці праводзіцца Еўрапейскім парламентам у ходзе пленарнай сесіі і звычайна зацягваецца на некалькі месяцаў. Гэта азначае, што рашэнне, хутчэй за ўсё, не будзе прынятае да правядзення ў Францыі прэзідэнцкіх выбараў, якія пройдуць у краіне  ў два туры — 23 красавіка і 7 мая.

Паводле ТАСС