Кіраўніцтва Каталоніі заклікае Мадрыд да перамоваў

Кіраўнік ураду Каталоніі Кім Тора заклікаў да перамоваў з цэнтральным урадам Гішпаніі пасля пяці дзён беспарадкаў на знак пратэсту супраць асуджэння каталёнскіх лідэраў, якія выступаюць за незалежнасць рэгіёну. Пра гэта паведамляе Радыё Свабода са спасылкай на Reuters.

«Мы заклікаем выканаўцу абавязкаў прэм’ер-міністра гішпанскага ўраду сесці за стол перамоваў, каб пагаварыць», — сказаў Тора, дадаўшы, што гвалт на гэтым тыдні не адлюстроўвае мірнага характару каталонскага руху за незалежнасць.
«Гвалт ніколі не быў і ніколі не будзе нашым сродкам, ні ў Барселоне, ні ў Тарагоне, ні ў Жыроне», — сказаў ён, маючы на ўвазе гарады Каталоніі, якія былі ахопленыя пратэстамі.
Барселона ў пятніцу перажыла ноч гарадмкіх забурэнняў, калі маладыя людзі ў масках перакрывалі дарогі падпаленымі смеццевымі бакамі і кідалі камяні ў сілавікоў. Паліцыя разганяла пратэстоўцаў шумавымі гранатамі і слезацечным газам.
Паводле дадзеных мясцовых уладаў, 182 чалавекі па ўсім рэгіёне пацярпелі, у тым ліку 152 у Барселоне. Каля 17 паліцэйскіх таксама трапілі ў шпіталі. Паліцыя заявіла, што ў пяты дзень сутыкненняў арыштавала 54 чалавек.
Вярхоўны суд Гішпаніі пасадзіў у турму дзевяць каталонскіх лідараў, якія выступалі за незалежнасць.