Памёр нобелеўскі лаўрэат Лю Сяобо

Кітайскі праваабаронца, лаўрэат Нобелеўскай прэміі міру Лю Сяобо памёр ва ўзросце 61 года. Пра гэта паведамляе Reuters.

Лаўрэат Нобелеўскай прэміі міру памёр 13 ліпеня ў універсітэцкай клініцы горада Шеньян на паўночным усходзе Кітая. Раніцай 12 ліпеня паступілі паведамленні, што стан здароўя Лю Сяобо зноў пагоршыўся, у яго заражэнне крыві і адмовілі жыццёва важныя органы.
У чэрвені гэтага года ў сувязі з хваробай Лю Сяобо вызвалілі з турмы, дзе ён адбываў 11-гадовы тэрмін.
Праваабаронцу арыштавалі ў 2008 годзе пасля таго, як ён падпісаў маніфест «Хартыя-2008" з заклікам да дэмакратычных рэформаў у Кітаі. У 2009 годзе Лю Сяобо прысудзілі да 11 гадоў пазбаўлення волі за «падрыў дзяржаўнага ладу».
У 2010 годзе Лю Сяобо атрымаў Нобелеўскую прэмію міру «за доўгую і негвалтоўную барацьбу за асноватворныя правы чалавека ў Кітаі». Улады Кітая назвалі рашэнне нобелеўскага камітэта «непрыстойным». Жонку праваабаронцы пасадзілі пад хатні арышт, а месца, адведзенае для лаўрэата пры ўручэнні прэміі ў Осла, засталося пустым.
Паводле tut.by