Прэм'ер-міністр Іспаніі: Урад і парламент Каталоніі будуць распушчаны

Прэм'ер-міністр Іспаніі Марыяна Рахой абвясціў, што ў рамках абмежавання аўтаноміі Каталоніі ўрад рэгіёна будзе распушчаны, а парламент пераабраны. Іх паўнамоцтвы перададуць цэнтральным уладам, абвясціў Рахой пасля пасяджэння кабінета міністраў 21 кастрычніка.

«Ніводная краіна свету не дапусціла ў сябе такога» (аднабаковага абвяшчэння незалежнасці), — сказаў Рахой.
Такія меры іспанскі ўрад хоча ўвесці ў рамках 155-га артыкула Канстытуцыі, які дазваляе прыпыніць аўтаномію ў тых выпадках, калі рэгіянальныя ўлады парушаюць закон і пагражаюць інтарэсам усёй краіны.
Для аднаўлення парадку ў Каталоніі на працягу паўгода правядуць выбары ў парламент, які затым зацвердзіць новы ўрад.
Чакаецца, што просьба ўрада аб абмежаванні паўнамоцтваў каталонскіх ўладаў будзе падтрымана Сенатам Іспаніі 27 кастрычніка і ўступіць у сілу на наступны дзень.

Паводле «Нашай Нівы»