Прычына аварыі на Кахоўскай ГЭС — выбух у падводным тунэлі: галоўнае з расследавання NYT
Рэдакцыя газеты New York Times правяла ўласнае расследаванне прычын катастрофы на Кахоўскай дамбе і апублікавала яго вынікі.
Журналісты New York Times апыталі амерыканскіх і ўкраінскіх экспертаў, а таксама вывучылі ўсе даступныя даныя — у тым ліку спадарожнікавыя даныя і паказчыкі сейсмічных станцый. Да якіх высноў яны прыходзяць?
Выбух на плаціне адбыўся ўнутры, атака звонку не прывяла б да катастрофы.
Прычым выбух, хутчэй за ўсё, быў наўмысным: ён адбыўся ў самым уразлівым месцы канструкцыі — у тунэлі, які праходзіць пад вадой праз бетонную аснову станцыі і вядзе ў машынную залу.
Магутны выбух быў накіраваны на парушэнне цэласнасці падмурка. Пасля чаго размешчаныя па суседстве часткі плаціны разбурыліся ўжо самі — пад каласальным ціскам вады.
Трапіць у гэты тэхнічным тунэль, які быў размешчаны ў бетонным фундаменце збудавання, можна было з машыннай залы, якая знаходзілася пад кантролем расійскіх вайскоўцаў.
У пацверджанне гэтай версіі выданне прыводзіць відэа, апублікаванае тэлеграм-каналам «Ваенны інфарматар» праз некалькі дзён пасля разбурэння плаціны. Як звярнулі ўвагу журналісты, у месцы, дзе была разбураная плаціна, не відаць бетоннай асновы-падмурку. Гэта можа сведчыць, што яно атрымала сур'ёзныя структурныя пашкоджанні.
Эксперты, з якімі пагаварылі журналісты, лічаць, што падобныя пашкоджанні плаціна не магла атрымаць звонку. У прыватнасці, інжынер Ігар Стралец, які працаваў у агенцтве водных рэсурсаў Украіны, падкрэсліў, што падмурак плаціны быў спраектаваны такім чынам, каб супрацьстаяць практычна любому вонкаваму ўздзеянню.
Таму, лічыць Стралец, адзіным тлумачэннем разбурэння бетоннай падставы плаціны з'яўляецца менавіта выбух у тэхнічным тунэлі, з-за якога плаціна пачала разбурацца пад ціскам вады.
З версіяй украінскага спецыяліста таксама згодныя некаторыя амерыканскія эксперты. «Калі вам трэба знішчыць плаціну, то для гэтага спатрэбіцца магутны выбух. Тунэль — ідэальнае месца, каб закласці выбухоўку», — заявіў Майкл Уэст, інжынер, які спецыялізуецца на пытаннях бяспекі плацін.
Паколькі станцыя будавалася ў савецкія гады, яе падрабязныя чарцяжы ёсць у Маскве — а з іх дапамогай знайсці гэта найбольш уразлівае для падрыву месца можна досыць лёгка, адзначаюць журналісты.
Нагадаем, расійскія ўлады сцвярджаюць, што разбурэнне плаціны Кахоўскай ГЭС адбылося з-за удараў УСУ. Паводле версіі Кіева, плаціну ўзарвалі знутры расійскія вайскоўцы. Таксама ёсць версія, што плаціна магла разбурыцца сама з-за высокага ўзроўню вады ў Кахоўскім вадасховішчы і пашкоджанняў, атрыманых за час вайны.
Спецыялісты з даследчай арганізацыі NORSAR, якая займаецца вывучэннем сейсмічных з'яў, зафіксавалі сігналы, якія сведчаць аб тым, што ў дзень разбурэння плаціны ў раёне станцыі адбыўся выбух. Акрамя таго, крыніца The New York Times у адміністрацыі Джо Байдэна заявіла, што амерыканскія спадарожнікі-шпіёны зафіксавалі выбух на плаціне непасрэдна перад яе разбурэннем.
Паводле bbcrussian, meduza.io