«Стан Саакашвілі крытычны». Лекары патрабуюць перавесці экс-прэзідэнта ў бальніцу, але ўлады пагрозы не бачаць

Незалежная група лекараў, якая дзейнічае пад эгідай упаўнаважанага па правах чалавека ў Грузіі, заявіла, што былы прэзідэнт краіны Міхаіл Саакашвілі, які працягвае галадаваць, знаходзіцца ў крытычным стане і яго неабходна тэрмінова перавесці з турэмнай бальніцы ў грамадзянскую клініку. Аднак у той жа дзень прадстаўнікі грузінскай пенітэнцыярнай сістэмы распавялі журналістам, што непасрэднай пагрозы жыццю Саакашвілі цяпер няма, паведамляе ВВС.

Дэманстрацыя ў падтрымку Міхаіла Саакашвілі ў Тбілісі, якая адбылася 15 лістападаў. Фота EPA

Медыкі, якіх сабрала амбудсмен Ніно Ламджарыя, агледзелі Саакашвілі ў аўторак і заявілі, што ў турэмным шпіталі ў Тбілісі, дзе цяпер знаходзіцца былы прэзідэнт, няма ўмоў для яго лячэння ў выпадку магчымых ускладненняў. Пры гэтым яны адзначылі, што Саакашвілі пакуль не мае патрэбу ў пераводзе ў рэанімацыю.

"Стан здароўя Міхаіла Саакашвілі ў цяперашні час крытычны па многіх жыццёвых паказчыках, таму мы лічым, што турэмная бальніца не гатовая аказаць чалавеку, які знаходзіцца ў такім крытычным стане, неабходнае лячэнне", — цытуе Інтэрфакс чальца медыцынскай групы Георгія Грыголію.

Сярод іншага лекары пацвердзілі, што Саакашвілі працягвае галадоўку на працягу 48 дзён, і ў яго адзначаныя некалькі небяспечных захворванняў. Лекары таксама лічаць высокай верагоднасць узнікнення страўнікава-кішачнага крывацёку. У выснове медыкаў сказана, што наступствамі гэтых дыягназаў могуць стаць кома або смяротная арытмія.

"Міхаіл Саакашвілі не спыняе галадоўку, таму з кожным днём яго стан будзе пагаршацца, — кажа Грыголія. — Мы рэкамендуем шпіталізаваць яго ў шматпрофільную клініку, у якой яму могуць аказаць паўнавартаснае лячэнне".

У сераду, 17 лістапада, прадстаўнікі грузінскай пенітэнцыярнай сістэмы заявілі, што ў турэмным шпіталі ёсць усе неабходныя ўмовы для ўтрымання Саакашвілі, а яго жыццю цяпер нічога не пагражае.

Нагадаем, у канцы верасня Саакашвілі, якому цяпер 53 гады, таемна вярнуўся ў Грузію з Украіны, дзе жыў цягам апошніх гадоў, і быў затрыманы 1 кастрычніка. У Грузіі яму прад'яўленыя абвінавачванні па некалькіх крымінальных справах, па дзвюх з іх ён быў завочна асуджаны і прысуджаны да шасці гадоў пазбаўлення волі. Адразу пасля затрымання экс-прэзідэнт абвясціў галадоўку ў знак пратэсту супраць пераследу, які ён лічыць палітычным.




Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: