Міхаіл Саакашвілі страціў прытомнасьць на 49-ы дзень галадоўкі

Былы прэзідэнт Грузіі Міхаіл Саакашвілі, які абвесціў галадоўку, страціў прытомнасць пасля сустрэчы з адвакатамі ў турэмным шпіталі. Пра гэта журналістам заявіў яго адвакат Бека Басілая.

Паводле слоў Басілая, пасля гэтага палітыка вынеслі з памяшкання на насілках. Пазней ён паведаміў, што стан былога прэзідэнта стабілізаваўся. «Не магу рабіць медыцынскіх ацэнак, але ён быў у вельмі цяжкім стане», — заявіў адвакат.

Саакашвілі трымае галадоўку з першага кастрычніка. Спачатку ён патрабаваў спыніць свой крымінальны пераслед. Цяпер — перавесці яго ў цывільны шпіталь з турэмнага. Палітык быў арыштаваны па прыбыцці ў Грузію, дзе завочна асуджаны па дзвюх крымінальных справах. Зараз у краіне пачаўся яшчэ адзін суд, дзе ён — абвінавачаны.

Апазіцыя заяўляе, што пераслед палітыка мае выключна палітычны характар. У падтрымку Саакашвілі галадаюць 10 дэпутатаў парламента і адзін з лідараў апазіцыйнай партыі «Адзіны нацыянальны рух».

Да яго вызвалення заклікалі шэраг дэпутатаў Еўрапарламента і былыя прэзідэнты Латвіі і Украіны. Каб вызваліць былога прэзідэнта, указ аб яго памілаванні павінна падпісаць прэзідэнтка Грузіі Саламэ Зурабішвілі. Яна некалькі разоў заяўляла, што рабіць гэтага не будзе.

Паводле «Свабоды».