У Казахстане здзейсніў самагубства топ-менеджар кампаніі дачкі Назарбаева

Кіраўнік фірмы казахстанскай кампаніі «Аператар РОП» Руслан Шамшыеў скончыў жыццё самагубствам. Паліцыя распачала крымінальную справу паводле артыкула аб давядзенні да самагубства.

Кампанію «Аператар РОП» казахстанскія СМІ (у прыватнасці, парталы kz.media і eurasianet) звязвалі з дачкой Назарбаева Аліяй. Сёння раніцай у Казахстане затрымалі кіраўніка кампаніі Медэта Кумаргаліева, а таксама віцэ-міністра экалогіі Ахметжана Прымкулава. Абодвух падазраюць у карупцыі, піша «Наша Ніва».

Да студзеньскіх падзей у Казахстане «Аператар РОП» займаўся ўтылізацыйным зборам у краіне.

11 студзеня прэзідэнт Касым-Жамарт Такаеў раскрытыкаваў працу кампаніі і прапанаваў перадаць яе функцыі дзяржструктурам.

19 студзеня адпаведны дакумент прыняў урад краіны. Актывы, створаныя за кошт сродкаў утылізацыйнага збору, былі перададзеныя ва ўласнасць дзяржавы.

Пасля пратэстаў у Казахстане дочкі Назарбаева перасталі з'яўляцца на публіцы, яго зяці былі адпраўленыя ў адстаўку ў розных кампаніях, а сам першы прэзідэнт краіны з'явіўся на публіцы толькі 18 студзеня, запісаўшы відэазварот, што ён не займаецца палітычнымі справамі, а цалкам падтрымлівае прэзідэнта Такаева.