Беларусь — у тройцы краін Еўропы з самай нізкай пакупніцкай здольнасцю
Беларусь у 2023 годзе трапіла ў тройку еўрапейскіх краін з самай нізкай пакупніцкай здольнасцю. Разам з нашай краінай — Украіна, дзе ідзе вайна, і Косава. Аналітычная кампанія GFK склала рэйтынг краін Еўропы па пакупніцкай здольнасці насельніцтва. У спісе — 42 краіны.
Днямі былі апублікаваныя вынікі даследавання кампаніі GfK «Пакупніцкая здольнасць у Еўропе, 2023 год».
У даследаванні эксперты аналізавалі паказчык пакупніцкай здольнасці ў 42 краінах кантынента.
Высветлілася, што 16 з 42 абследаваных краін знаходзяцца на ўзроўні вышэй за сярэдні па Еўропе. Гэта кантрастуе з 26 краінамі, пакупніцкая здольнасць на душу насельніцтва якіх ніжэйшая за сярэдні.
Глядзіце таксама
Першае месца ў рэйтынгу заняў Ліхтэнштэйн. Грамадзяне гэтай краіны маюць пакупніцкую здольнасць у 68 843 еўра на душу насельніцтва. За Ліхтэнштэйнам ідуць Швейцарыя з 49 592 еўра і Люксембург з 40 931 еўра.
У дзясятцы еўрапейскіх краін з найвышэйшым узроўнем пакупніцкай здольнасці насельніцтва таксама Ісландыя, Данія, Ірландыя, Аўстрыя, Нарвегія, Германія і Злучанае Каралеўства.
У дакладзе адзначаецца, што самая нізкая пакупніцкая здольнасць у Беларусі, Косава і Украіне. У дакуменце, праўда, не прывялі дакладных лічбаў па Беларусі.
Пры гэтым у даследаванні маецца інфармацыя пра Украіну. Там на душу насельніцтва прыпадае ўсяго 2478 еўра, што складае роўна 14 працэнтаў ад сярэдняга паказчыка па Еўропе.
Між тым у 2023 годзе сярэдняя пакупніцкая здольнасць на душу насельніцтва ў Еўропе складзе 17 688 еўра.
Глядзіце таксама
Агулам еўрапейцы могуць выдаткаваць каля 12,1 мільярда еўра ў 2023 годзе на прадукты харчавання, жыллё, паслугі, энергазатраты, страхаванне, адпачынак і спажывецкія пакупкі. Гэта адпавядае сярэдняй пакупніцкай здольнасці на душу насельніцтва ў памеры 17 688 еўра на год, што ўяўляе сабой намінальны рост на 5,8 працэнта ў параўнанні з перагледжанымі значэннямі папярэдняга года.
Паводле myfin.by